ઇન્દોર : વર્ષ ૨૦૧૬માં ઇન્દોરની હોટલ લેમન ટ્રીમાં બનેલી શિલ્પુ ભદોરિયાની રહસ્યમય મોતની ઘટનામાં જિલ્લા અદાલતે ઐતિહાસિક ચુકાદો આપ્યો છે. આ કેસમાં આત્મહત્યાની વાર્તા ઉભી કરનારા ગ્વાલિયરના ત્રણ આરોપીઓ આશુતોષ જોહરે, શૈલેન્દ્ર સારસ્વત અને નીરજ દંડોટિયાને કોર્ટે હત્યાના ગુનામાં દોષિત ઠેરવી આજીવન કેદની સજા ફટકારી છે. પોસ્ટમોર્ટમ રિપોર્ટમાં ખુલાસો થયો હતો કે યુવતીનું મોત નીચે પડવાથી નહીં, પરંતુ ગળું દબાવવાને કારણે થયું હતું, જેનાથી આરોપીઓના જુઠ્ઠાણાનો પર્દાફાશ થયો હતો.

તપાસ દરમિયાન સામે આવેલા ફોરેન્સિક પુરાવા આ કેસમાં વળાંક લાવનારા સાબિત થયા હતા. સંઘર્ષ દરમિયાન આરોપીના નખમાં મૃતકની ચામડીના અંશો મળી આવ્યા હતા અને સ્થળ પરથી પ્રાપ્ત વસ્તુઓ આરોપીના ડીએનએ સાથે મેચ થઈ હતી. આ ઉપરાંત હોટલના સીસીટીવી ફૂટેજ અને ટેટૂ આર્ટિસ્ટના નિવેદને સાબિત કર્યું હતું કે ઘટના સમયે ત્રણેય આરોપીઓ મૃતક સાથે રૂમમાં હાજર હતા. કોર્ટે માન્યું કે આરોપીઓએ અત્યંત ક્રૂરતાપૂર્વક હત્યા કરી પુરાવાનો નાશ કરવાનો પૂરતો પ્રયાસ કર્યો હતો.

૨૪ એપ્રિલ, ૨૦૨૬ના રોજ જાહેર થયેલા આ ચુકાદાએ ૧૦ વર્ષ લાંબી કાનૂની લડતનો અંત આણ્યો છે. કોરોનાકાળ અને આરોપીઓ દ્વારા લેવામાં આવેલા વારંવારના સમયને કારણે ટ્રાયલમાં વિલંબ થયો હતો, પરંતુ અંતે ૨૯ સાક્ષીઓ અને મજબૂત ટેકનિકલ પુરાવાઓએ ન્યાય અપાવ્યો છે. કોર્ટે હત્યા માટે આજીવન કેદ ઉપરાંત પુરાવાનો નાશ કરવા બદલ ત્રણેયને અલગથી સાત વર્ષની સખત કેદની સજા પણ સંભળાવી છે, જે સમાજમાં ગુનેગારો માટે એક લાલબત્તી સમાન કિસ્સો બન્યો છે.