સીતાપુર તા. ૮: ઉત્તર પ્રદેશના સીતાપુર જિલ્‍લામાં શુક્રવારની સાંજે એક અત્‍યંત કરુણ અને હૃદયદ્રાવક માર્ગ દુર્ઘટના સામે આવી છે. ધાર્મિક આસ્‍થા સાથે માંગલિક વિધિ પતાવીને પોતાના વતન તરફ પરત ફરી રહેલા નિર્દોષ શ્રદ્ધાળુઓ પર અચાનક મોતના રૂપમાં એક ટ્રક ત્રાટકી હતી. હાઈવે પર પૂરપાટ ઝડપે ધસી આવેલા કાળમુખા ભારે વાહને પાછળથી એટલી જોરદાર ટક્કર મારી હતી કે મુસાફરોથી ભરેલી ટ્રોલી રસ્‍તા પર પલટી ખાઈ ગઈ હતી. અકસ્‍માત એટલો ભયાનક હતો કે સ્‍થળ પર જ ૫ મહિલાઓના કમકમાટીભર્યા મોત નિપજ્‍યા હતા, જ્‍યારે અન્‍ય ૧૭ જેટલા લોકો ગંભીર રીતે લોહીલુહાણ થયા હતા.

આ કરુણાંતિકા પિસાવાં પોલીસ સ્‍ટેશન વિસ્‍તાર હેઠળ આવતા હિમતનગર ગામ નજીક સર્જાઈ હતી. હરદોઈ તરફથી પોતાના બાળકના મુંડન સંસ્‍કારની પવિત્ર વિધિ પૂર્ણ કરાવીને ગ્રામજનો એક સાથે બેસીને આનંદભેર ઘર તરફ જઈ રહ્યા હતા. વાતાવરણમાં ઉત્‍સવ અને ખુશીનો માહોલ હતો, પરંતુ ગામ નજીક પહોંચતા જ પાછળથી પૂરઝડપે આવતા બેકાબૂ ટ્રકના ચાલકે ટ્રોલીને જોરદાર અડફેટે લીધી હતી.

અચાનક થયેલા જોરદાર ધડાકાથી આખો વિસ્‍તાર ધણધણી ઊઠ્‍યો હતો અને વાહન રસ્‍તાની સાઈડમાં ઊંધું વળી ગયું હતું. ટ્રોલી પલટી જવાને કારણે અંદર સવાર મહિલાઓ, પુરુષો અને બાળકો લોખંડના ભારે માળખા નીચે કચડાઈ ગયા હતા. આ અણધારી આફત વચ્‍ચે સ્‍થળ પર ભયાનક ચીસાચીસ અને અફરાતફરી મચી ગઈ હતી. માથા અને શરીરના ભાગે ગંભીર ઈજાઓ થવાના કારણે પાંચ મહિલાઓએ ઘટનાસ્‍થળે જ દમ તોડી દીધો હતો.

આસપાસના ખેતરો અને ઘરોમાંથી અવાજ સાંભળીને દોડી આવેલા સ્‍થાનિક લોકોએ તાત્‍કાલિક મદદનો હાથ લંબાવ્‍યો હતો. ગામલોકોએ ભારે જહેમત ઉઠાવીને ઊંધી વળી ગયેલી ટ્રોલી નીચે દબાયેલા લોકોને બહાર કાઢવાનું શરૂ કર્યું હતું. આ દરમિયાન તાત્‍કાલિક પોલીસ કંટ્રોલ રૂમને જાણ કરવામાં આવી હતી, જેના પગલે સ્‍થાનિક પોલીસ કાફલો એમ્‍બ્‍યુલન્‍સ વાન સાથે તાબડતોબ ઘટનાસ્‍થળે પહોંચી ગયો હતો અને ઘાયલોને બહાર કાઢીને પ્રાથમિક સારવાર અપાવવાની તજવીજ હાથ ધરી હતી.(૩૮.૨)