સંગરુર:  પંજાબના સંગરુર જિલ્લાના લેહરાગા વિસ્તારમાંથી એક અત્યંત કરૂણ અને કંપાવનારી ઘટના સામે આવી છે. રવિવારે સાંજે જાખલ રોડ પર આવેલા ચોટિયાન ગામ નજીક રસ્તાના કામમાં વ્યસ્ત મનરેગા યોજના હેઠળના મજૂરો પર એક કાળમુખી કાર યમદૂત બનીને ત્રાટકી હતી. બેફામ ઝડપે ધસી આવેલી અને બેકાબૂ બનેલી કારે રસ્તા કિનારે કામ કરી રહેલા આશરે 23 મનરેગા કામદારોને કચડી નાખ્યા હતા. આ ભયાનક અકસ્માતમાં 8 શ્રમિકોના ઘટનાસ્થળે જ દર્દનાક મોત નીપજ્યા છે, જ્યારે અન્ય અનેક મજૂરો લોહીલુહાણ હાલતમાં ગંભીર રીતે ઘાયલ થતાં સમગ્ર વિસ્તારમાં ભારે સન્નાટો અને હાહાકાર મચી ગયો છે.

અહેવાલો અનુસાર, રવિવારની સાંજે ચોટિયાન ગામ નજીક પુરુષ અને મહિલાઓ સહિત 23 જેટલા મનરેગા કામદારો દૈનિક મજૂરી કાર્યમાં વ્યસ્ત હતા. આ દરમિયાન અચાનક પૂરપાટ ઝડપે આવી રહેલી કારના ચાલકે વાહન પરથી કાબૂ ગુમાવ્યો હતો. કારની ઝડપ એટલી ચંડ પ્રચંડ હતી કે રસ્તા પર કામ કરી રહેલા નિર્દોષ શ્રમિકોને સ્થળ પરથી હટવાનો કે પોતાની જાતને બચાવવાનો ક્ષણભરનો પણ સમય મળ્યો નહોતો. કારે એક પછી એક અનેક શ્રમિકોને જોરદાર ટક્કર મારીને રોંદી નાખ્યા હતા, જેના કારણે ઘટનાસ્થળ ચીસિયારીઓ અને લોહીના ખાબોચિયાંથી ભરાઈ ગયું હતું.

આ કરૂણ દુર્ઘટનાને પગલે સ્થાનિક લોકો અને રાહદારીઓ તાત્કાલિક મદદ માટે દોડી આવ્યા હતા. ઘટના અંગે જાણ થતાં જ પોલીસ કાફલો સ્થળ પર પહોંચી ગયો હતો અને ઘાયલોને તાકીદે સારવાર અર્થે નજીકની હોસ્પિટલમાં ખસેડવાની કામગીરી હાથ ધરી હતી. પોલીસે આ મામલે ગુનો નોંધીને અકસ્માત સર્જનાર વાહન અને ચાલક વિરુદ્ધ કાનૂની તપાસ તેજ કરી છે. બીજી તરફ, માર્ગ કિનારે કામ કરતાં મનરેગા શ્રમિકોની સુરક્ષા અને વાહનોની અનિયંત્રિત ઝડપ સામે સ્થાનિક સ્તરે ભારે રોષ જોવા મળી રહ્યો છે.