લઘમાન : પાડોશી દેશ પાકિસ્તાનથી પોતાના વતન અફઘાનિસ્તાન પરત ફરી રહેલા નિર્દોષ શરણાર્થીઓ માટે આ મુસાફરી જીવનની છેલ્લી મુસાફરી બની ગઈ છે. એક તરફ પાકિસ્તાનની સરકારે લીધેલા કડક નિર્ણયોને કારણે લાખો અફઘાનીઓ દેશ છોડવા મજબૂર બન્યા છે, ત્યારે બીજી તરફ વતન પહોંચવા માટે નીકળેલા આ પરિવારો પર કુદરત અને નિયતિનો અસહ્ય માર પડ્યો છે. લઘમાન પ્રાંતમાં કાબુલ-નંગરહાર હાઈવે પર થયેલા એક ભયાનક ટ્રક અકસ્માતમાં 10 બાળકો અને 5 મહિલાઓ સહિત કુલ 18 લોકોએ જીવ ગુમાવ્યા છે, જેણે સમગ્ર વિશ્વમાં અરેરાટી ફેલાવી દીધી છે.
વતન પરત ફરતી વેળાએ સર્જાયો કાળમુખો અકસ્માત
અધિકારીઓના જણાવ્યા અનુસાર, શનિવારે પૂર્વ અફઘાનિસ્તાનના મુખ્ય હાઈવે પર શરણાર્થીઓને લઈને જઈ રહેલી એક ટ્રક અચાનક અનિયંત્રિત થઈને પલટી ગઈ હતી. આ અકસ્માત એટલો ગંભીર હતો કે ઘટનાસ્થળે જ ચીસકારો અને રુદનનો માહોલ છવાઈ ગયો હતો. મૃતકોમાં બાળકોની મોટી સંખ્યા હોવાથી માનવતાવાદી સંસ્થાઓમાં પણ ભારે શોકની લાગણી પ્રસરી છે. આ દુર્ઘટનામાં ઘાયલ થયેલા 35થી વધુ લોકોને તાત્કાલિક ધોરણે નંગરહારની હોસ્પિટલોમાં ખસેડવામાં આવ્યા છે, જ્યાં તેઓ જીવન-મરણ વચ્ચે ઝોલાં ખાઈ રહ્યા છે.
શરણાર્થીઓ માટે કપરો સમય
પાકિસ્તાન દ્વારા 2023 થી ગેરકાયદેસર પ્રવાસીઓ વિરુદ્ધ હાથ ધરવામાં આવેલા અભિયાનને કારણે લાખો અફઘાનીઓ પોતાના વર્ષો જૂના રહેઠાણો છોડીને વતન પરત ફરવા મજબૂર બન્યા છે. આ અકસ્માતનો ભોગ બનેલા લોકોમાં એવા ઘણા પરિવારો હતા જેઓ દાયકાઓથી પાકિસ્તાનમાં વસેલા હતા અને ત્યાં જ તેમનું જીવન વીત્યું હતું. પરંતુ હાલની રાજકીય અને સુરક્ષા વ્યવસ્થાને કારણે તેમને દેશ છોડવો પડ્યો અને અફસોસ કે, વતનની ધરતી પર પગ મૂકતા પહેલા જ તેમણે દુનિયા છોડવી પડી.
તંત્ર અને લોકોમાં શોકનું મોજું
તાલિબાન સરકારના પ્રવક્તાએ આ ઘટના પર ઊંડું દુઃખ વ્યક્ત કરીને પીડિત પરિવારો પ્રત્યે સંવેદના પ્રગટ કરી છે. અત્યારે સમગ્ર વિસ્તારમાં આ ઘટનાને લઈને ભારે રોષ અને શોકનો માહોલ છે. જે શરણાર્થીઓ પોતાના વતનમાં શાંતિ અને સુરક્ષાની શોધમાં નીકળ્યા હતા, તેમનું આ રીતે કાળનો કોળિયો બનવું એ યુદ્ધ અને સ્થળાંતરની ભયાનકતાને દર્શાવે છે.