​શ્રીનગર: કુદરતે જાણે મન મૂકીને સૌંદર્ય વેેર્યું હોય તેમ કાશ્મીર ઘાટીમાં સિઝનની પ્રથમ હિમવર્ષા થતાં જ સમગ્ર પ્રદેશનું વાતાવરણ અત્યંત આહલાદક અને રોમાંચક બની ગયું છે. ઊંચા પર્વતોથી લઈને ખીણો સુધી બરફની સફેદ ચાદર પથરાઈ જતાં પ્રકૃતિ સોળે કળાએ ખીલી ઊઠી છે.

​વિશ્વપ્રસિદ્ધ પર્યટન સ્થળો જેવાં કે ગુલમર્ગ, સોનમર્ગ, પહેલગામ અને જોઝિલા પાસ વિસ્તારમાં મોસમની પહેલી બરફબારી થતાં જ તાપમાનમાં ભારે ઘટાડો નોંધાયો છે. પહાડી શિખરો પર બરફની ચમક પથરાતાં જ નયનરમ્ય દૃશ્યો સર્જાયા છે, જેને કેમેરામાં કંડારવા માટે પ્રવાસીઓમાં ભારે ઉત્સાહ જોવા મળી રહ્યો છે.

​હવામાન વિભાગના પૂર્વાનુમાન મુજબ, આગામી ૨૪ થી ૪૮ કલાક દરમિયાન ઊંચાણવાળા વિસ્તારોમાં હળવાથી મધ્યમ હિમવર્ષા ચાલુ રહેવાની શક્યતા છે. આ પ્રથમ બરફબારીથી પ્રવાસન ક્ષેત્ર સાથે સંકળાયેલા સ્થાનિક વેપારીઓ, હોટેલ માલિકો અને ગાઈડોમાં નવી આશાનો સંચાર થયો છે. શિયાળાની શરૂઆત સાથે જ પ્રવાસીઓનો ઘોડાપૂર ઉમટી પડવાની શક્યતાને પગલે સમગ્ર કાશ્મીર ઘાટીમાં ઉત્સવ જેવો માહોલ જોવા મળી રહ્યો છે.