કટિહાર: બિહારનું કટિહાર શહેર ફરી એકવાર આતંકવાદી કનેક્શનને કારણે દેશભરની સુરક્ષા એજન્સીઓના રડાર પર આવ્યું છે. પ્રતિબંધિત સંગઠન PFI (પોપ્યુલર ફ્રન્ટ ઓફ ઇન્ડિયા) સાથેના સંબંધો અને ગેરકાયદેસર હથિયારોની હેરાફેરી માટે અગાઉ વગોવાયેલા આ શહેરમાંથી હવે 'ગઝવા-એ-હિંદ' કેસમાં મહત્વની ધરપકડ કરવામાં આવી છે. તપાસ એજન્સીઓએ હાથ ધરેલી ગુપ્ત કાર્યવાહીમાં રાષ્ટ્રવિરોધી પ્રવૃત્તિઓમાં સામેલ હોવાની આશંકા સાથે કટિહારના કનેક્શન ખુલતા સુરક્ષા સેતુઓમાં ચિંતાનું મોજું ફરી વળ્યું છે.

તાજેતરની કાર્યવાહીમાં દિલ્હી પોલીસ અને સ્થાનિક સુરક્ષા ટીમોએ શહેરના વ્યસ્ત ગણાતા શહીદ ચોક વિસ્તારમાંથી નાસિર યુસુફ વાજા નામના કાશ્મીરી યુવાનને શંકાસ્પદ હાલતમાં ઝડપી લીધો છે. સૂત્રોના જણાવ્યા અનુસાર, આ યુવક લાંબા સમયથી સુરક્ષા એજન્સીઓની નજરમાં હતો અને તેની હિલચાલ આતંકવાદી ભંડોળ (ટેરર ફંડિંગ) તેમજ પ્રતિબંધિત સંગઠનોના પ્રચાર-પ્રસાર સાથે જોડાયેલી હોવાના પુરાવા મળ્યા છે. કાશ્મીરથી છેક બિહારના આ ખૂણે આવીને દેશ વિરોધી મોડ્યુલ તૈયાર કરવાનું કાવતરું ઘડવામાં આવી રહ્યું હોવાની આશંકાએ અધિકારીઓને દોડતા કરી દીધા છે.

નોંધનીય છે કે કટિહારમાં આ પ્રકારની કાર્યવાહી પહેલીવાર નથી થઈ. માર્ચ 2023માં પણ શહીદ ચોક ખાતેથી શંકાસ્પદ લોકોની અટકાયત કરવામાં આવી હતી, જે બાદ સતત આ વિસ્તારમાં બહારથી આવતા લોકો પર બાજ નજર રાખવામાં આવી રહી હતી. ધરપકડ કરાયેલા શખ્સ પાસેથી જપ્ત કરવામાં આવેલા દસ્તાવેજો અને ડિજિટલ ઉપકરણોની ઝીણવટભરી તપાસ ચાલી રહી છે. આ ધરપકડ બાદ સુરક્ષા એજન્સીઓ એ જાણવા મથામણ કરી રહી છે કે કટિહારમાં અન્ય કેટલા સ્લીપર સેલ સક્રિય છે અને તેમને સરહદ પારથી કોઈ સૂચનાઓ મળી રહી હતી કે કેમ.