અસ્તાના, તા. ૧૨: સંસાધનોથી સમૃદ્ધ અને મધ્ય એશિયાના સૌથી મોટા રાષ્ટ્ર કઝાકિસ્તાને વૈશ્વિક રોકાણકારો અને પ્રતિભાઓને આકર્ષવા માટે પોતાની સ્થળાંતર નીતિમાં ક્રાંતિકારી ફેરફારોની જાહેરાત કરી છે. રાષ્ટ્રપતિ કાસિમ-જોમાર્ટ ટોકાયેવ દ્વારા હસ્તાક્ષર કરાયેલા નવા હુકમનામા મુજબ, દેશ હવે જૂની પરમિટ પ્રથા છોડીને 'પ્રોત્સાહન-આધારિત' સિસ્ટમ અપનાવી રહ્યો છે, જેનો મુખ્ય ઉદ્દેશ્ય યુરેશિયામાં રોકાણ અને નવીનતા માટે પ્રાદેશિક કેન્દ્ર બનવાનો છે.
શું છે આ 'અલ્ટીન વિઝા' (ગોલ્ડન વિઝા)?
કઝાકિસ્તાન સરકારે રોકાણકારો અને વ્યાવસાયિકો માટે ખાસ "અલ્ટીન વિઝા" યોજના રજૂ કરી છે. આ અંતર્ગત અસ્તાના ઇન્ટરનેશનલ ફાઇનાન્શિયલ સેન્ટર (AIFC) ના રોકાણકારો, IT નિષ્ણાતો અને ઉચ્ચ કૌશલ્ય ધરાવતા વ્યાવસાયિકોને લાંબા ગાળાના રહેઠાણ માટે પ્રાધાન્ય આપવામાં આવશે. નોંધપાત્ર બાબત એ છે કે IT નિષ્ણાતો માત્ર એક મહિનાના નિવાસ બાદ આ વિઝા માટે પાત્ર બની શકશે, જ્યારે કુશળ કાર્યકરો માટે આ મર્યાદા છ મહિનાની રાખવામાં આવી છે.
કરમુક્તિ અને અન્ય આકર્ષક ફાયદાઓ
ગોલ્ડન વિઝા મેળવનાર વિદેશી નાગરિકોને અનેક આર્થિક લાભો મળશે, જેમાં:
•    વ્યક્તિગત આવકવેરો (Income Tax) માંથી મુક્તિ.
•    મિલકત વેરો અને જમીન વેરામાંથી સંપૂર્ણ મુક્તિ.
•    સંપત્તિની જાહેર ઘોષણા (Universal Declaration) માંથી મુક્તિ.
•    કઝાકિસ્તાની નાગરિકોની જેમ જ તમામ સરકારી અને નાણાકીય સેવાઓનો લાભ.
ડિજિટલ ઈ-રેસીડન્સી અને અંગ્રેજી સેવાઓ
ટેકનોલોજીના યુગમાં કઝાકિસ્તાને 'ઈ-રેસીડન્સી ઇન્વેસ્ટ પ્રોગ્રામ' પણ શરૂ કર્યો છે, જેના દ્વારા વિદેશી રોકાણકારો ભૌતિક રીતે હાજર રહ્યા વિના પણ ઓનલાઈન માધ્યમથી દેશના પ્રોજેક્ટ્સમાં રોકાણ કરી શકશે. વધુમાં, વિદેશી પરિવારોને મુશ્કેલી ન પડે તે માટે અસ્તાના અને અલ્માટી જેવા શહેરોમાં હોસ્પિટલો, શાળાઓ અને પોલીસ સ્ટેશનોમાં ફરજિયાત અંગ્રેજી ભાષાની સેવાઓ શરૂ કરવામાં આવશે.
AI હબ અને રોકાણના નવા સીમાચિહ્નો
કૃત્રિમ બુદ્ધિ (AI) ક્ષેત્રે પ્રગતિ કરવા માટે અલ્માટીમાં ખાસ 'AI હબ' સ્થાપવામાં આવશે. આ સાથે જ ટેક્સ રેસિડેન્સી મેળવવા માટે જરૂરી રોકાણનો સમયગાળો ૯૦ દિવસથી ઘટાડીને માત્ર ૩૦ દિવસ કરી દેવામાં આવ્યો છે. કઝાકિસ્તાનનો આ અભિગમ તેને આવનારા સમયમાં ગ્લોબલ ટેક અને ફાઈનાન્સ સેક્ટરમાં એક મજબૂત ખેલાડી તરીકે પ્રસ્થાપિત કરશે.