ઉત્તરકાશી: ગંગોત્રીથી આગળ ઊંચા હિમાલયમાં સ્થિત કેદારતાલ કુદરતી સૌંદર્ય અને સાહસિક પર્યટનનું એક અનોખું મિશ્રણ પૂરું પાડે છે. સમુદ્ર સપાટીથી આશરે ૪,૭૦૦ મીટરની ઊંચાઈ પર સ્થિત આ હિમનદી તળાવ ઊંચા પર્વત શિખરો અને ખડકાળ ભૂપ્રદેશથી ચારેય બાજુથી ઘેરાયેલું છે. અહીંથી દેખાતા થલય સાગર, ભૃગુપંથ અને જોગીન શિખરોના ભવ્ય દૃશ્યો આ સ્થળને વૈશ્વિક સ્તરે એક વિશિષ્ટ ઓળખ બક્ષે છે, જ્યારે આ તળાવમાંથી નીકળતી કેદાર ગંગા આગળ વધીને પવિત્ર ભાગીરથી નદીમાં ભળી જાય છે.
ગંગોત્રીથી કેદારતાલ સુધીનો આ ટ્રેક આશરે ૨૬ કિલોમીટર લાંબો છે, જેનો સામાન્ય માર્ગ ગંગોત્રીથી શરૂ થઈને ભોજખરક અને ત્યારબાદ કેદારખરક થઈને પસાર થાય છે. આ રસ્તા પર આવતી અત્યંત સાંકડી પટ્ટીઓ, ખડકાળ ખીણો અને ઊંચાઈ પરના પ્રતિકૂળ પ્રવાહો ટ્રેકર્સ અને સાહસિકો માટે મોટા પડકારો ઊભા કરે છે. આ રોમાંચક યાત્રા સફળ બનાવવા માટે ઉત્તમ શારીરિક તંદુરસ્તી, પર્વતીય પરિસ્થિતિઓનો પૂરતો અનુભવ અને અગાઉથી મજબૂત તૈયારી હોવી અનિવાર્ય છે.
હિમાલયની ગોદમાં આવેલા આ અદ્ભુત ટ્રેક પર જવા માટે ટ્રેકર્સમાં ભારે ઉત્સાહ જોવા મળે છે. પ્રકૃતિ પ્રેમીઓ અને ફોટોગ્રાફર્સ માટે આ સ્થળ કોઈ સ્વર્ગથી કમ નથી, પરંતુ કઠિન ચઢાણને કારણે પ્રવાસીઓએ સુરક્ષાના તમામ નિયમોનું ચુસ્તપણે પાલન કરવું પડે છે. સ્થાનિક પ્રસાશન અને ટ્રેકિંગ એજન્સીઓ દ્વારા સાહસિકોની સલામતી માટે સમયાંતરે માર્ગદર્શિકાઓ જારી કરવામાં આવે છે.
આગામી દિવસોમાં ટ્રેકિંગ સિઝનને ધ્યાનમાં રાખીને વહીવટી તંત્ર અને વન વિભાગ દ્વારા રૂટ પર સુરક્ષા વ્યવસ્થા તથા તબીબી સહાયની સુવિધાઓ વધુ સઘન બનાવવામાં આવી રહી છે. સાહસિક પ્રવાસનને પ્રોત્સાહન આપવાની સાથે પર્યાવરણની જાળવણી અને પ્લાસ્ટિક મુક્ત ટ્રેક અભિયાનને પણ વેગ આપવામાં આવી રહ્યો છે,