નવી દિલ્હી: દિલ્હીના જંતર-મંતર પર 6 જૂનના રોજ આયોજિત વિરોધ પ્રદર્શન પહેલાં જ 'કોકરોચ જનતા પાર્ટી' (CJP) રાજકીય અને સામાજિક ચર્ચાઓના કેન્દ્રમાં આવી ગઈ છે. સંગઠને સૌરવ દાસ, વિજયા દહિયા અને આશુતોષ રંકાને પ્રવક્તા તરીકે જાહેર કર્યા છે, પરંતુ સોશિયલ મીડિયા પર આ પસંદગી સામે આકરા સવાલો ઉઠ્યા છે. યુઝર્સે સંગઠનમાં મહિલાઓ, દલિત, આદિવાસી અને LGBTQ સમુદાયના પ્રતિનિધિત્વના અભાવ પર સવાલ ઉઠાવતા તેને 'પુરુષ પ્રધાન' પાર્ટી ગણાવી હતી.
શું છે વિવાદનું મુખ્ય કારણ?
CJP દ્વારા કરવામાં આવેલી પ્રવક્તાઓની જાહેરાતમાં કોઈ મહિલાનું નામ ન હોવાથી યુઝર્સે સોશિયલ મીડિયા પર નારાજગી વ્યક્ત કરી હતી. ટીકાકારોએ સ્પષ્ટપણે કહ્યું હતું કે, "અન્ય લોકો આને માત્ર પુરુષોની પાર્ટી ગણાવે તે પહેલાં મહિલા પ્રવક્તાઓને સામેલ કરો". આ વિવાદ વધતા સંગઠનના સ્થાપક અભિજીત દિપકકે સામે આવીને સ્પષ્ટતા કરી છે. તેમણે જણાવ્યું કે, પાર્ટીની મહિલા ટીમના સભ્યોને આ ભૂમિકા ઓફર કરવામાં આવી હતી, પરંતુ સતત મળતી ઓનલાઇન ધમકીઓ અને પર્સનલ એટેકને કારણે તેમણે મોખરે રહેવાને બદલે પડદા પાછળ રહીને આંદોલનમાં સક્રિય રહેવાનું પસંદ કર્યું છે.
નવી પ્રતિભાને આમંત્રણ
અભિજીત દિપકકે તમામ આક્ષેપોને નકારી કાઢીને મહિલાઓને સંગઠનમાં જોડાવા માટે ખુલ્લું આમંત્રણ આપ્યું છે. તેમણે ટ્વિટર (X) પરની પોસ્ટમાં જણાવ્યું હતું કે, "અમે એવી યુવતીઓને આવકારીએ છીએ જે આ ચળવળનો ભાગ બનવા અને પ્રવક્તા તરીકે જવાબદારી સંભાળવા ઇચ્છુક હોય".
શું છે CJP નો મુખ્ય મુદ્દો?
કોકરોચ જનતા પાર્ટીનો આ વિરોધ મુખ્યત્વે CBSE, NEET અને CUET જેવી મહત્વની પરીક્ષાઓમાં પેપર લીક અને અનિયમિતતાઓ વિરુદ્ધ છે. આ આંદોલનને પ્રખ્યાત આબોહવા કાર્યકર્તા સોનમ વાંગચુકે પણ સમર્થન આપ્યું છે. વાંગચુકે સ્પષ્ટ કર્યું છે કે જો 5 જૂન સુધીમાં સરકાર આ બાબતે કોઈ નક્કર પગલાં નહીં ભરે, તો તેઓ 6 જૂનના રોજ દિલ્હીમાં CJP ના સભ્યો સાથે આંદોલનમાં જોડાશે.
પ્રવક્તાઓની પ્રોફાઇલ:
•    સૌરવ દાસ: તપાસ, વિશ્લેષણ અને રિપોર્ટિંગમાં લાંબો અનુભવ ધરાવતા પત્રકાર.
•    વિજયા દહિયા: લેખક અને ફિલ્મ નિર્માતા, જેમણે અગાઉ જાણીતા YouTube સર્જકો સાથે સંશોધનનું કામ કર્યું છે.
•    આશુતોષ રંકા: IIT કાનપુર અને લંડન સ્કૂલ ઓફ ઇકોનોમિક્સના ભૂતપૂર્વ વિદ્યાર્થી, જેઓ અગાઉ મેકકિન્સે એન્ડ કંપનીમાં સલાહકાર તરીકે કામ કરી ચૂક્યા છે.