સિઓલ:  વર્ષ ૨૦૨૬ માં વૈશ્વિક શેરબજારો વચ્ચે દક્ષિણ કોરિયાના શેરબજાર 'કોસ્પી' એ એક અભૂતપૂર્વ ઇતિહાસ રચી દીધો છે. ભારતીય શેરબજારના સેન્સેક્સ અને નિફ્ટી ચાલુ વર્ષે નેગેટિવ રિટર્ન આપીને રોકાણકારોને નિરાશ કરી રહ્યા છે, ત્યારે કોરિયન બજારે સદીની સૌથી મોટી તેજી નોંધાવીને વૈશ્વિક સ્તરે સનસનાટી મચાવી છે. આ વર્ષે અત્યાર સુધીમાં કોસ્પીએ રોકાણકારોને ૧૦૦% થી વધુનું બમ્પર વળતર આપ્યું છે, જે છેલ્લા ૨૬ વર્ષમાં વિશ્વના કોઈપણ દેશના શેરબજારમાં નોંધાયેલો સૌથી મોટો ઉછાળો છે. આ ઐતિહાસિક પ્રદર્શન હવે ૧૯૯૯ ના ડોટ-કોમ બબલ સમયના નાસ્ડેકના ૧૦૨% ના ઓલ-ટાઇમ રેકોર્ડને તોડવાની બિલકુલ નજીક પહોંચી ગયું છે.

આ આશ્ચર્યજનક તેજી પાછળ વૈશ્વિક સ્તરે આર્ટિફિશિયલ ઇન્ટેલિજન્સ (AI) અને ટેકનોલોજીના કારણે મેમરી ચિપ્સની માંગમાં આવેલું માળખાકીય પરિવર્તન જવાબદાર છે. દક્ષિણ કોરિયાની દિગ્ગજ ટેક કંપનીઓ જેવી કે સેમસંગ ઇલેક્ટ્રોનિક્સ અને એસકે હાયનિક્સ (SK Hynix) ના શેરોમાં આવેલા સુનામી જેવા ઉછાળાને કારણે બેન્ચમાર્ક કોસ્પી ઇન્ડેક્સ માત્ર થોડા જ મહિનામાં ૫,૦૦૦ ના સ્તરને વટાવીને સીધો ૮,૦૦૦ ની પાર નીકળી ગયો છે. ૩૦ ડિસેમ્બર ૨૦૨૫ ના રોજ ૪,૨૧૪.૧૭ પોઈન્ટ પર બંધ થયેલો આ ઇન્ડેક્સ ચાલુ વર્ષે બુધવાર સુધીમાં ૧૦૧% ની તેજી સાથે ૮,૪૫૭.૦૯ પોઈન્ટના રેકોર્ડ સ્તરે બંધ આવ્યો છે, જે દર્શાવે છે કે આ વૃદ્ધિ માત્ર અસ્થાયી નથી પરંતુ લાંબાગાળાની મજબૂતીનો સંકેત છે.

બીજી તરફ, વિશ્વના બાકીના અગ્રણી બજારોની સરખામણી કરીએ તો કોરિયાની આસપાસ કોઈ દેશ ટકી શક્યો નથી. તાઈવાન એક્સચેન્જ ૫૪.૭૪% અને જાપાનનો નિક્કી ૨૨૫ ઇન્ડેક્સ ૩૧.૯૬% ના વધારા સાથે અનુક્રમે બીજા અને ત્રીજા સ્થાને છે, જ્યારે અમેરિકાના નાસ્ડેકમાં માત્ર ૧૦% નો સાધારણ વધારો નોંધાયો છે. ચીનનું શાંઘાઈ કમ્પોઝિટ પણ માત્ર ૪.૬૫% જ વધી શક્યું છે. આ વૈશ્વિક સ્તરે એશિયાના બજારોમાં ભારતનો સેન્સેક્સ ૧૧% અને નિફ્ટી ૮.૬૫% ના ઘટાડા સાથે સૌથી ખરાબ પ્રદર્શન કરનારા સૂચકાંકોમાં સામેલ થયા છે, જેના કારણે વૈશ્વિક રોકાણકારો હવે ભારતીય બજારોમાંથી ભંડોળ પાછું ખેંચીને દક્ષિણ કોરિયાના ટેક સેક્ટરમાં મોટા પાયે રોકાણ કરી રહ્યા છે.