કોશામ્બી : ઉત્તર પ્રદેશના કોશામ્બી જિલ્લામાં ગત 31 ઓગસ્ટના રોજ પ્રયાગરાજ-કોશામ્બી સરહદ નજીક આવેલી એક ગેરકાયદે ફટાકડા ફેક્ટરીમાં થયેલા ભીષણ વિસ્ફોટના કેસમાં પોલીસને મોટી સફળતા મળી છે. આ ગોઝારી દુર્ઘટનામાં નવ બાળકો સહિત કુલ 14 નિર્દોષ લોકોના કરૂણ મોત નીપજ્યા હતા, જેના કારણે સમગ્ર વિસ્તારમાં શોકનું મોજુ ફરી વળ્યું હતું. આ પ્રકરણમાં પોલીસ પકડથી દૂર રહેલા છ વોન્ટેડ આરોપીઓ પૈકીના છેલ્લા અને મુખ્ય આરોપીને શુક્રવારે મોડી રાત્રે પોલીસ સાથેના સામસામે ગોળીબાર બાદ ઝડપી લેવામાં આવ્યો છે.

મંઝનપુરના સર્કલ ઓફિસર સૌરભ સાવંતે આ અંગે વિગતો આપતા જણાવ્યું કે પકડાયેલા છેલ્લા આરોપીની ઓળખ શકીલ તરીકે થઈ છે, જે મિયાં મહમૂદપુર મનૌરીનો રહેવાસી છે. પોલીસ દ્વારા તેની ધરપકડ માટે 50 હજાર રૂપિયાનું ઈનામ જાહેર કરવામાં આવ્યું હતું. પકડાયેલો આરોપી શકીલ ગેરકાયદે ફટાકડા યુનિટના માલિક અને મુખ્ય આરોપી નોશાદનો ભાઈ છે. આ ગંભીર ઘટના બાદ પોલીસે એક સત્તાવાર ફરિયાદના આધારે ભારતીય ન્યાય સંહિતા અને વિસ્ફોટક અધિનિયમની સંબંધિત કલમો હેઠળ છ લોકો સામે ગુનો નોંધ્યો હતો. જેમાંથી પાંચ આરોપીઓની અગાઉ જ ધરપકડ કરીને તેમને કોર્ટ સમક્ષ રજૂ કરવામાં આવ્યા હતા, જ્યારે શકીલ સતત ફરાર ચાલી રહ્યો હતો.

શુક્રવારે રાત્રે ગુપ્ત માહિતીના આધારે મંઝનપુર પોલીસ અને સ્પેશિયલ ઓપરેશન ગ્રૂપની સંયુક્ત ટીમોએ દીવર કોટારી વિસ્તારમાં નૌબસ્તા ગામ તરફ જતા રસ્તા પર ચેકિંગ અને સઘન સર્ચ ઓપરેશન હાથ ધર્યું હતું. આ ઓપરેશન દરમિયાન પોલીસને એક શંકાસ્પદ મોટરસાઇકલ સવાર નજરે પડ્યો. જ્યારે ટીમોએ તેને રોકવાનો પ્રયાસ કર્યો ત્યારે સવારે પોલીસ પર અચાનક ફાયરિંગ શરૂ કરી દીધું. સ્વબચાવમાં પોલીસે પણ વળતી જવાબી કાર્યવાહી કરી, જેમાં આરોપીના પગમાં ગોળી વાગી અને તે નીચે પડી ગયો.

ઘાયલ આરોપીને તાત્કાલિક કસ્ટડીમાં લઈને સારવાર અર્થે જિલ્લા હોસ્પિટલ મંઝનપુર ખાતે ખસેડવામાં આવ્યો છે. પોલીસે તેના કબજામાંથી એક ગેરકાયદે દેશી તમંચો, એક જીવતો કારતૂસ, બે ખાલી કારતૂસ, એક હજાર રૂપિયા રોકડા, એક મોબાઈલ ફોન અને મોટરસાઇકલ જપ્ત કરી છે. આરોપી સામે મંઝનપુર પોલીસ સ્ટેશનમાં ભારતીય ન્યાય સંહિતાની કલમ 109(1) અને આર્મ્સ એક્ટની કલમ 3/25 હેઠળ અલગથી ગુનો નોંધવામાં આવ્યો છે અને કાયદેસરની આગળની કાર્યવાહી હાથ ધરવામાં આવી છે.

પૂછપરછ દરમિયાન આરોપી શકીલે પોલીસ સમક્ષ કબૂલાત કરી હતી કે તે અને તેના સાથીદારો આર્થિક ફાયદો મેળવવા માટે મહમૂદપુર મનૌરી પાવર હાઉસ પાસે આવેલા એક શેડમાં ગેરકાયદેસર રીતે ફટાકડા અને વિસ્ફોટક સામગ્રીનું ઉત્પાદન તેમજ સંગ્રહ કરતા હતા. પોલીસે આ કેસમાં અન્ય કડીઓ જોડવા માટે વધુ તપાસ શરૂ કરી છે.