નવી દિલ્હી : નવી દિલ્હીમાં ચૂંટણી પંચ સામે ચાલી રહેલા વિરોધ પ્રદર્શન અને વ્યાપક અટકાયતો વચ્ચે લદ્દાખના પ્રખ્યાત સામાજિક કાર્યકર્તા સોનમ વાંગચુકે સરકારને ચેતવણી આપી છે. તેમણે સ્પષ્ટ શબ્દોમાં જણાવ્યું છે કે જો વિરોધ પ્રદર્શન દરમિયાન અટકાયત કરવામાં આવેલા નેતાઓ અને કાર્યકર્તાઓને રવિવાર સુધીમાં મુક્ત કરવામાં નહીં આવે, તો તેઓ મજબૂર થઈને ભૂખ હડતાળ પર ઉતરી જશે અથવા તો મોટી પદયાત્રા શરૂ કરશે.

દેશની વર્તમાન પરિસ્થિતિ અંગે ચિંતા વ્યક્ત કરતા વાંગચુકે કહ્યું કે હાલની સ્થિતિ અઘોષિત કટોકટી જેવી પ્રતીત થઈ રહી છે. તેમણે દિલ્હીમાં વિરોધ કરી રહેલા તમામ યુવાનો અને નાગરિકોને એકસંપ થઈને શાંતિ જાળવવા અપીલ કરી હતી. જોકે, તેમણે સ્પષ્ટ કર્યું હતું કે તેઓ પોતે હિમાલયી ક્ષેત્રોમાં શિયાળાની પૂર્વ તૈયારીઓ, ગ્લેશિયર સંબંધિત જોખમો અને પાણીની સુરક્ષા જેવા રાષ્ટ્રીય મહત્વના કાર્યોમાં વ્યસ્ત હોવાને કારણે હાલ દિલ્હી પહોંચી શક્યા નથી.

બીજી તરફ, નવી દિલ્હીમાં ચૂંટણી પંચના મુખ્ય કમિશનરના રાજીનામાની માંગ સાથે રસ્તા પર ઉતરેલા કોક્રોચ જનતા પાર્ટીના નેતાઓ અભિજીત દીપક, સૌરવ દાસ અને આશુતોષ રાંકા સહિત આશરે ૧૫૦૦ જેટલા પ્રદર્શકોની દિલ્હી પોલીસે એરપોર્ટ અને વિરોધ સ્થળો પરથી અટકાયત કરી લીધી છે. આ આંદોલનને કારણે રાજધાનીમાં ભારે પોલીસ બંદોબસ્ત અને તણાવપૂર્ણ માહોલ જોવા મળી રહ્યો છે.

આ સમગ્ર રાજકીય હલચલ વચ્ચે કોંગ્રેસ નેતા રાહુલ ગાંધીએ પણ એક વિડિયો શેર કરીને કેન્દ્ર સરકાર અને શાસક પક્ષ પર આકરા પ્રહારો કર્યા છે. તેમણે જણાવ્યું હતું કે તેઓ છેલ્લા એક દાયકાથી વધુ સમયથી સરકારની નીતિઓ સામે સંઘર્ષ કરી રહ્યા છે અને પોતાના વિરોધીઓની કાર્યશૈલીને સારી રીતે સમજે છે.

સ્થાનિક સ્તરે કાયદો અને વ્યવસ્થા જાળવવા માટે દિલ્હી પોલીસ દ્વારા સંવેદનશીલ વિસ્તારોમાં પેટ્રોલિંગ વધારી દેવામાં આવ્યું છે અને કોઈપણ અપ્રિય ઘટના ન ઘટે તે માટે ચુસ્ત સુરક્ષા વ્યવસ્થા ગોઠવવામાં આવી છે.