​નવી દિલ્હી : લદ્દાખને બંધારણની છઠ્ઠી અનુસૂચિમાં સામેલ કરવા અને સ્વાયત્તતા આપવાની માંગ સાથે દેશની રાજધાની દિલ્હીમાં અડિંગો જમાવીને બેઠેલા જાણીતા પર્યાવરણવિદ અને સામાજિક કાર્યકર સોનમ વાંગચુકે પોતાની ભૂખ હડતાળના અંત લાવવા માટે કેન્દ્ર સરકાર સમક્ષ મહત્વની શરતો મૂકી છે. નવી દિલ્હી સ્થિત લદ્દાખ ભવન ખાતે આમરણ ઉપવાસ પર ઉતરેલા વાંગચુકે કેન્દ્રીય મંત્રી જિતેન્દ્ર સિંહ અને ભાજપના રાષ્ટ્રીય અધ્યક્ષ તથા કેન્દ્રીય મંત્રી જે.પી. નડ્ડાને એક સત્તાવાર પત્ર લખીને શરતી આંદોલન સમેટવાની તૈયારી દર્શાવી છે. જો કે, તેમણે સ્પષ્ટ કર્યું છે કે તેઓ આંદોલન કરી રહેલા યુવાનો અને વિદ્યાર્થીઓના ભવિષ્યના ભોગે કોઈપણ પ્રકારનું સમાધાન કરવા તૈયાર નથી.

​કેન્દ્ર સરકારને મોકલેલા આ પત્રમાં સોનમ વાંગચુકે ત્રણ મુખ્ય શરતોનો ઉલ્લેખ કર્યો છે, જેમાં સૌથી મહત્વની માંગ આંદોલનમાં સક્રિય ભૂમિકા ભજવનારા વિદ્યાર્થીઓની સુરક્ષા અંગેની છે. વાંગચુકે ચિંતા વ્યક્ત કરતા જણાવ્યું છે કે આ શાંતિપૂર્ણ પ્રદર્શનમાં ભાગ લેનારા કોઈપણ યુવા પ્રદર્શનકારી કે વિદ્યાર્થી સામે સરકાર દ્વારા દંડાત્મક કે બદલાની ભાવનાથી કોઈ કાયદાકીય કાર્યવાહી ન કરવામાં આવે. શિક્ષણ અને સામાજિક કાર્યોમાં પરત ફરવાની ઈચ્છા વ્યક્ત કરવાની સાથે તેમણે ભારપૂર્વક કહ્યું છે કે લદ્દાખના યુવાનોનું હિત તેમના માટે સર્વોપરી છે.

​આ ઉપરાંત, તેમણે લદ્દાખની સ્વાયત્તતા અને બંધારણીય અધિકારોની રક્ષા માટે કેન્દ્ર સરકાર અને લદ્દાખના પ્રતિનિધિઓ વચ્ચે મડાગાંઠમાં ફસાયેલી વાર્તાલાપની પ્રક્રિયાને પુનઃ સક્રિય કરવાની માંગ કરી છે. સરકાર આ મુદ્દાઓ પર વહેલી તકે સકારાત્મક વલણ અપનાવી ચર્ચા આગળ વધારે તેવી અપીલ પત્રમાં કરવામાં આવી છે. ત્રીજી શરત તરીકે, તેમણે કેન્દ્ર સરકાર પાસે લદ્દાખની જમીન, સંસ્કૃતિ અને પર્યાવરણના સંરક્ષણ માટે અગાઉ અપાયેલા વચનો અને માંગણીઓ અંગે લેખિત અથવા સત્તાવાર પ્લેટફોર્મ પરથી સ્પષ્ટ અને નક્કર ખાતરી માંગી છે.

​ઉલ્લેખનીય છે કે સોનમ વાંગચુક અને લદ્દાખના સેંકડો પ્રદર્શનકારીઓ પદયાત્રા કરીને દિલ્હી પહોંચ્યા હતા, જ્યાં લદ્દાખને પૂર્ણ રાજ્યનો દરજ્જો આપવા અને બંધારણીય સુરક્ષા કવચ પૂરું પાડવા માટે લાંબા સમયથી પ્રદર્શન ચાલી રહ્યું છે. હવે જ્યારે આંદોલન નિર્ણાયક તબક્કામાં પહોંચ્યું છે, ત્યારે વાંગચુકની આ શરતો પર કેન્દ્ર સરકાર શું નિર્ણય લે છે અને વાર્તાલાપના ટેબલ પર ક્યારે પરત ફરે છે, તેના પર સમગ્ર દેશની નજર મંડાયેલી છે.