જયપુર :રાજસ્થાન એટીએસ (ATS) દ્વારા જયપુરના વાટિકા વિસ્તારમાંથી ૩૬ વર્ષીય બબીતા ધાકડ ઉર્ફે ખાદીજાની ધરપકડ કરવામાં આવી છે, જે આંતરરાષ્ટ્રીય આતંકવાદી સંગઠન જૈશ-એ-મોહમ્મદના ટોચના કમાન્ડરો સાથે સીધા સંપર્કમાં હતી. પૂછપરછમાં સામે આવ્યું છે કે બબીતા "દુનિયા ધોખેબાઝ" ફેસબુક આઈડી દ્વારા પાકિસ્તાની આતંકવાદીઓ સાથે સંપર્કમાં રહીને રાજસ્થાનમાં મહિલાઓનું 'લેડી સ્લીપર સેલ' તૈયાર કરવાનું ખતરનાક મિશન ચલાવી રહી હતી.

તપાસમાં ચોંકાવનારા પુરાવા મળ્યા છે કે બબીતાના સંપર્કોમાં ૨૦૧૬ના નાગરોટા આર્મી કેમ્પ હુમલાનો માસ્ટરમાઇન્ડ કારી ઝરાર અને ૧૯૯૯ના કંદહાર વિમાન હાઇજેકિંગ (IC-814) કેસનો મુખ્ય આરોપી યુસુફ અઝહર ઉર્ફે ઉસ્તાદ ઘોરી સામેલ હતા. બબીતાએ અબુ ઉબૈદાહ નામના જૈશ કમાન્ડરના કહેવાથી ધર્મ પરિવર્તન કર્યું હતું અને તેની સાથે પાકિસ્તાન જઈને લગ્ન કરવા માટે પણ તૈયાર હતી. બબીતાના મોબાઈલમાંથી મળેલા ૩૭૦ પાકિસ્તાની મિત્રોના લિસ્ટમાંથી ૧૦૦ જેટલા શંકાસ્પદોની ઓળખ થઈ છે, જેનો ડેટા હાલ NIA સાથે મેચ કરવામાં આવી રહ્યો છે.

રાજસ્થાન એટીએસના એસપી મનીષ ત્રિપાઠીએ જણાવ્યું હતું કે, બબીતા છેલ્લા બે વર્ષથી આતંકવાદીઓ સાથે સતત સંપર્કમાં હતી અને તેને આતંકવાદી પ્રવૃત્તિઓ માટે તાલીમ આપવાનું કાવતરું ઘડવામાં આવ્યું હતું. અત્યાર સુધીની તપાસમાં આતંકવાદીઓના ત્રણ મુખ્ય એકાઉન્ટ્સની પુષ્ટિ થઈ છે જે દેશ વિરોધી અનેક પ્રવૃત્તિઓમાં સક્રિય રહ્યા છે. એટીએસની સાયબર ટીમ હાલમાં તેના ડિજિટલ ફૂટપ્રિન્ટ્સ અને ફેસબુક એકાઉન્ટ દ્વારા જોડાયેલા અન્ય શંકાસ્પદોની સઘન તપાસ કરી રહી છે.

આ ધરપકડ બાદ સુરક્ષા એજન્સીઓ રાજસ્થાનમાં સક્રિય આતંકવાદી નેટવર્કને લઈને વધુ સતર્ક બની છે. આગામી સમયમાં આ મહિલા સ્લીપર સેલ સાથે જોડાયેલા અન્ય સભ્યોની ધરપકડ થવાની શક્યતા છે. દેશની સુરક્ષા એજન્સીઓ હવે આ નેટવર્કનો વ્યાપ કેટલો છે અને તેમાં અન્ય કેટલી મહિલાઓ જોડાયેલી છે તેની તપાસ કરી રહી છે, જેથી આતંકવાદી સંગઠનોના આ ઓપરેશનને સંપૂર્ણપણે નિષ્ફળ બનાવી શકાય.