નવી દિલ્હી : દિવાળી અને છઠ પૂજાના પવિત્ર તહેવારો વચ્ચે ટ્રેનની ટિકિટ બુક કરાવવા માટે લાખો મુસાફરો એકસાથે ઓનલાઈન પ્લેટફોર્મ પર ઉમટી પડતા મંગળવારે સવારે આઈઆરસીટીસી (IRCTC) ની વેબસાઇટ અને મોબાઇલ એપ પર ભારે ધસારો થવાને કારણે સેવાઓમાં અસ્થાયી વિક્ષેપ સર્જાયો હતો.

પ્રાપ્ત વિગતો અનુસાર, સવારે અનેક મુસાફરોએ ખાતામાં લૉગ-ઈન કરવામાં, ટ્રેનની ઉપલબ્ધતા તપાસવામાં અને ટિકિટ બુકિંગ પ્રક્રિયા પૂર્ણ કરવામાં ભારે વિલંબ તથા મુશ્કેલીઓનો સામનો કરવો પડ્યો હોવાની વ્યાપક ફરિયાદો સોશિયલ મીડિયા પર કરી હતી.

આઉટેજ ટ્રેકિંગ પ્લેટફોર્મ ડાઉનડિટેક્ટર પર પણ આ અંગે અસંખ્ય ફરિયાદો નોંધાઈ હતી, જેના પગલે તંત્ર હરકતમાં આવ્યું હતું અને સ્થિતિની ગંભીરતાને ધ્યાનમાં રાખીને તાત્કાલિક ખુલાસાઓ રજૂ કરવામાં આવ્યા હતા.

આ અંગે સત્તાવાર સ્પષ્ટતા કરતા આઈઆરસીટીસી દ્વારા જણાવવામાં આવ્યું હતું કે ઓનલાઈન રિઝર્વેશન પોર્ટલ સંપૂર્ણપણે બંધ નહોતું, પરંતુ એકસાથે અત્યંત મોટી સંખ્યામાં યુઝર્સ દ્વારા લૉગિન કરવાનો પ્રયાસ થવાને કારણે કામગીરી ધીમી પડી ગઈ હતી.

કંપનીએ વધુમાં ઉમેર્યું હતું કે તહેવારોની મોસમમાં ટિકિટોની માંગ અનેકગણી વધી જતી હોય છે, અને હાલમાં સર્જાયેલી આ અસ્થાયી સમસ્યા થોડા જ સમયમાં નિવારવામાં આવી છે તથા તમામ માધ્યમો પર ઈ-ટિકિટ બુકિંગ સેવાઓ સંપૂર્ણપણે રાબેતા મુજબ કાર્યરત છે.

આગામી સમયમાં મુસાફરોને વધુ સુરક્ષિત, ઝડપી અને સીમલેસ ટિકિટ બુકિંગનો અનુભવ પૂરો પાડવા માટે ડિજિટલ ઈન્ફ્રાસ્ટ્રક્ચરને વધુ મજબૂત બનાવવાની સાથે નેક્સ્ટ જનરેશન સિસ્ટમમાં જરૂરી ટેક્નોલોજી અપગ્રેડેશનની કામગીરી સતત જારી રાખવામાં આવશે.