તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
લલિત મોદીએ મોદી સ્ટેડિયમને તોડીને આધુનિક સુવિધાઓ સાથે નવેસરથી બનાવવાની ઈચ્છા વ્યક્ત કરી
માત્ર મેચ માટે જ નહીં, મોદી સ્ટેડિયમને ૩૬૫ દિવસ ધમધમતું રાખવા માટે લલિત મોદીએ તેને તોડીને ફરીથી બનાવવાનો આપ્યો વિચાર લલિત મોદીએ સ્ટેડિયમમાં આધુનિક એસ્કેલેટર, આધુનિક કિચન અને આધુનિક રેસ્ટોરન્ટ્સ હોવા જોઈએઃ તેને ૩૬૫ દિવસનું ડેસ્ટિનેશન બનાવવું જોઈએઃ મોલ, ફાઈવ સ્ટાર બાથરૂમ અને આધુનિક ઈન્ફ્રાસ્ટ્રક્ચર ઊભું કરવા પર ભાર મૂક્યો.
મુંબઇ તા.૩: આઈપીએલ (ઇન્ડિયન પ્રીમિયર લીગ) ના સ્થાપક સર્જક શ્રી લલિત મોદીએ એક ઇન્ટરવ્યુમાં જણાવ્યું છે કે જો તેમને તક મળે તો તેઓ અમદાવાદના નરેન્દ્રભાઈ મોદી સ્ટેડિયમને સંપૂર્ણપણે તોડીને ફરીથી બનાવશે. તેઓ આ સ્ટેડિયમને માત્ર ક્રિકેટ પૂરતું સીમિત રાખવાના બદલે ૩૬૫ દિવસ ચાલતા આધુનિક મનોરંજન અને શોપિગ હબમાં ફેરવવા માંગે છે, જેથી ચાહકોને વર્લ્ડ ક્લાસ સુવિધાઓ મળી શકે.
ક્રિકેટ જગતમાં આઈપીએલનો પાયો નાખનાર લલિત મોદીએ ફરી એકવાર પોતાના એક નિવેદનથી ખળભળાટ મચાવી દીધો છે. ગલ્ફ ન્યુઝ સહિતના વિવિધ આંતરરાષ્ટ્રીય અને ડિજિટલ મીડિયા અહેવાલો મુજબ, એક તાજેતરના ઇન્ટરવ્યુમાં તેમણે અમદાવાદ સ્થિત વિશ્વના સૌથી મોટા નરેન્દ્રભાઈ મોદી સ્ટેડિયમ અંગે મોટું અને ચોંકાવનારું નિવેદન આપ્યું છે. લલિત મોદીનું માનવું છે કે જો સ્ટેડિયમની ડિઝાઇન 'ફેન ફર્સ્ટ' (ચાહકોને પ્રાથમિકતા આપતી) નીતિ સાથે તૈયાર કરવામાં આવે, તો તે વિશ્વના સૌથી શ્રેષ્ઠ સ્પોર્ટ્સ વેન્યુમાં સ્થાન પામી શકે છે.
લલિત મોદીએ સ્પષ્ટ શબ્દોમાં કહી દીધું કે, જો આજે હું ત્યાં હોત, તો હું આ સ્ટેડિયમને સંપૂર્ણપણે તોડી નાખત અને તેને નવેસરથી બનાવત. તેમાં આધુનિક એસ્કેલેટર, આધુનિક કિચન અને આધુનિક રેસ્ટોરન્ટ્સ હોવા જોઈએ. તેને ૩૬૫ દિવસનું ડેસ્ટિનેશન બનાવવું જોઈએ.
સ્ટેડિયમને માત્ર મેચના દિવસે જ નહીં પરંતુ આખું વર્ષ ધમધમતું રાખવાના વિઝન સાથે તેમણે જણાવ્યું કે આ જગ્યા માત્ર ક્રિકેટ પૂરતી સીમિત ન રહેવી જોઈએ. તેમાં શોપિગ મોલ્સ, એન્ટરટેઇનમેન્ટ ઝોન (મનોરંજન ક્ષેત્રો), ઉન્નત કૂલિગ સિસ્ટમ્સ (અદ્યતન ઠંડક વ્યવસ્થા), પ્રીમિયમ હોસ્પિટાલિટી વિસ્તારો અને ચાહકો માટે અત્યંત ઉચ્ચ સ્તરની સવલતો હોવી જોઈએ.
તેમણે આધુનિક ટેકનોલોજીનો હવાલો આપતા ઉમેર્યું કે, આજે એવી ટેકનોલોજી ઉપલબ્ધ છે જેનાથી ફાઈવ સ્ટાર (૫ સ્ટાર) કક્ષાના બાથરૂમ અને સેલ્ફ-ક્લીનિગ (સ્વયં સાફ થતા) શૌચાલયો બનાવી શકાય. સ્ટેડિયમનું ઈન્ફ્રાસ્ટ્રક્ચર એવું હોવું જોઈએ કે ચાહકો માત્ર પાંચ (૫) મિનિટમાં સ્ટેડિયમની અંદર આવી શકે અને બહાર પણ જઈ શકે.
ભારતના મોટાભાગના સ્ટેડિયમોના મેનેજમેન્ટની પણ તેમણે આકરી ઝાટકણી કાઢી હતી. તેમણે ભારપૂર્વક કહ્યું કે સંચાલકોનું ધ્યાન માત્ર આવક વધારવા પર હોય છે, નહીં કે મેચના દિવસે પ્રેક્ષકોનો અનુભવ સુધારવા પર. તેમણે એક વરવી વાસ્તવિકતા વર્ણવતા કહ્યું કે, મેચ ભલે ત્રણ (૩) કલાકની હોય, પરંતુ ચાહકો ઘણા વહેલા આવી જાય છે. તેઓ પોતાના નાના બાળકો સાથે ત્યાં ચાર (૪) થી પાંચ (૫) કલાક પસાર કરે છે. એવા સમયે તેમને સ્વચ્છ સુવિધાઓ, ઉચ્ચ ગુણવત્તાવાળો ખોરાક અને આરામદાયક વાતાવરણની જરૂર હોય છે. આ જ વસ્તુની અત્યારે ખામી છે.
લલિત મોદીના મતે ભવિષ્યના સ્ટેડિયમો માત્ર મેચના દિવસે જીવંત થતા સ્થળો બનીને ન રહેતા, આખું વર્ષ ચાલતા મનોરંજનના કેન્દ્રો બનવા જોઈએ.
(3:20 PM IST)
છેલ્લા 8 દિવસમાં સૌથી લોકપ્રિય 
