તવિયાના ઓઇલ સ્ટોરેજ પર યુક્રેનિયન ડ્રોન ત્રાટક્યા બાદ દેશના સંરક્ષણ મંત્રી એન્ડ્રીસ સ્પ્રુડ્સે રાજીનામું આપ્યું છે. રશિયાના ઇલેક્ટ્રોનિક યુદ્ધ તંત્ર દ્વારા આ ડ્રોનની દિશા ભટકાવી દેવામાં આવી હતી, જેના કારણે આ ગંભીર ઘટના બની હતી.

યુરોપીય દેશ લાતવિયામાં સુરક્ષામાં એક મોટી ચૂક સામે આવ્યા બાદ ભારે રાજકીય ઉથલપાથલ સર્જાઈ છે. 

ગુરુવારે રશિયાની સરહદ તરફથી ઉડીને આવેલા બે યુક્રેનિયન ડ્રોન લાતવિયાના ઓઇલ સ્ટોરેજ સુવિધાઓ પર ત્રાટક્યા હતા. આ ઘટનાના પગલાં રૂપે, લાતવિયાના સંરક્ષણ મંત્રી એન્ડ્રીસ સ્પ્રુડ્સે આજે પોતાના પદ પરથી રાજીનામું આપી દીધું છે. દેશના વડાપ્રધાન એવિકા સિલિનાએ ડ્રોન વિરોધી સંરક્ષણ સિસ્ટમ સમયસર ગોઠવવામાં નિષ્ફળ રહેવા બદલ સંરક્ષણ મંત્રીની આકરી ટીકા કરી હતી અને તેમનું રાજીનામું માંગ્યું હતું. 

આ ખાલી પડેલા પદ પર વડાપ્રધાને તાત્કાલિક અસરથી લાતવિયન આર્મીના કર્નલ રાયવિસ મેલ્નીસને નવા સંરક્ષણ મંત્રી તરીકે નિયુક્ત કર્યા છે. આ આંતરરાષ્ટ્રીય ઘટના અંગે સ્પષ્ટતા કરતા યુક્રેનના વિદેશ મંત્રી એન્ડ્રી સિબિહાએ પુષ્ટિ કરી છે કે તે ડ્રોન યુક્રેનના જ હતા. જોકે, તેમણે સ્પષ્ટ કર્યું હતું કે રશિયન ઇલેક્ટ્રોનિક વોરફેર સિસ્ટમ દ્વારા યુક્રેનિયન ડ્રોનનો માર્ગ જાણીજોઈને બદલી નાખવામાં આવ્યો હતો, જેથી તેઓ રશિયાની અંદર તેમના નિર્ધારિત લક્ષ્યો સુધી પહોંચવાને બદલે ભટકીને લાતવિયામાં પ્રવેશી ગયા હતા. 

નાટો સભ્ય દેશ પર થયેલા આ ડ્રોન હુમલાને કારણે બાલ્ટિક પ્રદેશમાં તણાવ વધ્યો છે. આ ઘટના સ્પષ્ટપણે દર્શાવે છે કે રશિયા અને યુક્રેન વચ્ચે ચાલી રહેલા યુદ્ધની સીધી અસર હવે પડોશી યુરોપિયન દેશોની સરહદો પર પણ વ્યાપક સુરક્ષા જોખમ ઊભું કરી રહી છે.