સોનીપત, તા.૨૩: સોશિયલ મીડિયા પર ખ્યાતિ મેળવવાની ઘેલછા અને રોફ જમાવવાની ઘાતક લત કેવી રીતે એક સામાન્ય પરિવારના યુવાનોને ગુનાખોરીના અંધકારમાં ધકેલી શકે છે, તેનું જીવંત ઉદાહરણ સોનીપતના બરોડા ગામના બે મિત્રોની આ દુખદ કહાની પૂરું પાડે છે. બોલિવૂડ અભિનેતા ટાઈગર શ્રોફની કાર પર થયેલા ચકચારી ગોળીબારના કેસમાં સોનીપતના આ યુવાનોની સંડોતરી બહાર આવતા જ સમગ્ર વિસ્તારમાં સનસનાટી મચી ગઈ છે. મોબાઈલ પર હથિયારો સાથેના ફોટા અને રીલ્સ અપલોડ કરવાની શરૂઆત કરનાર અંકિત અને તેનો સગીર સહાધ્યાયી કુખ્યાત લોરેન્સ બિશ્નોઈ ગેંગના ગળાડૂબ સંપર્કમાં આવીને કાયદાના શિકંજામાં ફસાઈ ચૂક્યા છે.

ઘટનાની વિગતો અનુસાર, સામાન્ય મજૂર પરિવારોમાં જન્મેલા અને ૧૨મા ધોરણમાં અભ્યાસ કરતા આ બંને મિત્રો છેલ્લા એકાદ વર્ષથી સોશિયલ મીડિયા પર હથિયારો પ્રદર્શિત કરતા સ્ટેટસ મૂકવાના શોખીન બન્યા હતા. તેમની આ હરકતોને કારણે તેઓ કુખ્યાત ગેંગસ્ટરોના રડાર પર આવ્યા અને બિશ્નોઈ ગેંગના ગુનેગારોએ તેમને મોટા સપના તથા ખોટી લાલચો આપીને પોતાના પ્રભાવ હેઠળ લીધા હતા. શાળાના શિક્ષકો અને પરિવારે બંનેના બદલાતા સ્વભાવ અને ઘટી રહેલી હાજરી અંગે વારંવાર ચેતવણીઓ આપી હતી, પરંતુ યુવાવસ્થાના જોશ અને કુસંગતમાં અંધ બનેલા આ યુવાનોએ ઘરના વડીલોની એક પણ વાત કાને ધરી નહોતી.

સ્થાનિક અહેવાલો અને પરિવારજનો દ્વારા ખુલાસો કરવામાં આવ્યો છે કે છેલ્લા ત્રણ-ચાર મહિનાથી બંનેએ શાળાએ જવાનું પણ નહિવત્ કરી દીધું હતું અને તેમનો પરિવાર સાથે સતત ઝઘડો રહેતો હતો. અગાઉ સગીર મિત્રની બાઇક ચોરીના કેસમાં ધરપકડ પણ થઈ ચૂકી હતી, છતાં તેમનામાં કોઈ સુધારો આવ્યો ન હતો. ગત ૧૫ સપ્ટેમ્બરના રોજ ગામમાં ભરાયેલા મેળામાં જવાનું કહીને ઘેરથી નીકળેલા આ બંને મિત્રો રહસ્યમય સંજોગોમાં ગુમ થઈ ગયા હતા, જે સીધા મુંબઈમાં થયેલા ગુનાહિત કાર્યો સાથે જોડાઈ ગયા હોવાનું પોલીસ તપાસમાં બહાર આવ્યું છે.

તારીખ ૧૮ ઓક્ટોબરના રોજ મુંબઈ ખાતે અભિનેતા ટાઈગર શ્રોફની કાર પર થયેલા ફાયરિંગ પ્રકરણની સઘન તપાસ દરમિયાન મુંબઈ, હરિયાણા, દિલ્હી અને રાજસ્થાનની સંયુક્ત પોલીસે મોટી કાર્યવાહી કરી છે. આ હુમલાના ગુનામાં સોનીપતના દેવડુ ગામના રેહાન અંસારી, બરોડા ગામના અંકિત અને તેના સગીર મિત્ર સહિત હરિયાણા, ઉત્તર પ્રદેશ અને બિહારના અન્ય શખ્સોની ધરપકડ કરવામાં આવી છે. પોલીસ હાલ આ આખા આંતરરાજ્ય ગુનાહિત નેટવર્ક અને ગેંગસ્ટરો સાથેના તેમના નાણાકીય તથા વ્યવહારિક સંબંધોની કડીઓ જોડવામાં વ્યસ્ત છે.

આ ઘટના સામે આવ્યા બાદ સોનીપત અને આસપાસના ગ્રામ્ય વિસ્તારોના વાલીઓમાં ભારે ચિંતાનું મોજું ફરી વળ્યું છે. પોતાના બાળકો સ્માર્ટફોન અને સોશિયલ મીડિયાના માધ્યમથી કુસંગતમાં ન ફસાઈ જાય તે માટે માતા-પિતા હવે અત્યંત સચેત બન્યા છે. મજૂરી કરીને સંતાનોને ભણાવતા પિતાઓની આશા પર પાણી ફરી વળતા પરિવારજનો શોકમાં ડૂબી ગયા છે, કારણ કે થોડી ક્ષણિક વાહવાહી મેળવવાની લ્હાયમાં યુવાનોનું આખું ભવિષ્ય બરબાદ થઈ ગયું છે.

આ કેસમાં હવે પોલીસ દ્વારા પકડાયેલા તમામ આરોપીઓની કસ્ટડીમાં રાખીને વધુ પૂછપરછ હાથ ધરવામાં આવી રહી છે કે આ યુવાનોને મુંબઈ સુધી હુમલો કરવા માટે કોણે અને કેવી રીતે મોકલ્યા હતા. તપાસ એજન્સીઓ સોશિયલ મીડિયા હેન્ડલ્સ અને ચેટ હિસ્ટ્રીના આધારે આ સિન્ડિકેટના મૂળ સુધી પહોંચવાના પ્રયાસ કરી રહી છે, જેથી ગેંગસ્ટરો દ્વારા સગીરો અને વિદ્યાર્થીઓનો ઉપયોગ કરવાના ષડ્યંત્રનો સંપૂર્ણ પર્દાફાશ કરી શકાય.