પુણે : મહારાષ્ટ્રના છત્રપતિ સંભાજીનગરથી યુકેમાં ઉચ્ચ અભ્યાસ (એમબીએ) માટે ગયેલી એક યુવતીના રહસ્યમય મોતનો અત્યંત ચોંકાવનારો મામલો સામે આવ્યો છે, જ્યાં પરિવારજનોને જાણ કર્યા વગર જ ગુપ્ત રીતે ભારત પરત ફરેલી ૩૪ વર્ષીય મુગ્ધા દેશમુખ નામના યુવતીનો મૃતદેહ પુણેના પિંપરી-ચિંચવડ વિસ્તારમાં આવેલા એક ભાડાના ફ્લેટમાંથી શંકાસ્પદ હાલતમાં મળી આવ્યો છે.

પ્રાપ્ત વિગતો અનુસાર, મુગ્ધા જુલાઈ ૨૦૨૫માં લંડન ગઈ હતી અને ત્યાં પાર્ટ-ટાઈમ જોબ કરતી હતી, પરંતુ પરિવારજનોને અંધારામાં રાખીને તે ચાલુ વર્ષના ઓગસ્ટ મહિનામાં જ ભારત પરત આવી ગઈ હતી અને પુણેના ગહુંજે વિસ્તારમાં આવેલા લોઢા બેલમોન્ડો કોમ્પ્લેક્સના એક ફ્લેટમાં રહેતી હતી, જે અંગે પરિવારને કોઈ જ ખબર નહોતી.

ઘટનાની વિગતવાર માહિતી આપતા શિરગાંવ પોલીસ સ્ટેશનના સિનિયર ઈન્સ્પેક્ટર દેવેન્દ્ર ચવાણે જણાવ્યું હતું કે ગત ૨૪ ઓક્ટોબરથી મુગ્ધાનો મોબાઈલ સ્વિચ ઓફ આવતા અને લંડન સ્થિત મિત્રો કે પરિવારજનો સાથેનો સંપર્ક તૂટી જતાં તેના પિતા અવિનાશ દેશમુખે પોલીસ સ્ટેશનમાં ગુમ થયાની ફરિયાદ નોંધાવી હતી, અને દીકરીની ભાળ મેળવવા માટે બેંક સ્ટેટમેન્ટની ચકાસણી કરવામાં આવી હતી.

બેંક ખાતાની તપાસ દરમિયાન આઠથી પચીસ ઓક્ટોબર દરમિયાન ફૂડ ડિલિવરી અને ઓનલાઈન સર્વિસ પ્લેટફોર્મ્સ પર થયેલા ટ્રાન્ઝેક્શનનું લોકેશન ટ્રેસ કરતા પોલીસ પિંપરી-ચિંચવડના આ ફ્લેટ સુધી પહોંચી હતી, જ્યાં કીમેકરની મદદથી દરવાજો ખોલતા મુગ્ધા મૃત અવસ્થામાં મળી આવી હતી, જો કે તેના શરીર પર ઈજાના કોઈ નિશાન નહોતા મળ્યા.

પોલીસ દ્વારા મૃત્યુનું સાચું કારણ જાણવા માટે તેના વિસેરા પ્રિઝર્વ કરીને મોકલી આપવામાં આવ્યા છે અને આ દિશામાં વધુ સઘન તપાસ હાથ ધરવામાં આવી છે, જેણે સમગ્ર વિસ્તારમાં ભારે ચકચાર મચાવી દીધી છે.