તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
કૈલાસ માનસરોવર યાત્રા માટે ૧૦૦૦ શ્રદ્ધાળુઓનું લિસ્ટ ફાઇનલ
લિપુલેખ પાસ અને નાથુ લા પાસ એમ બે રૂટથી ૫૦-૫૦ના જૂથમાં ૨૦ બેચમાં યાત્રા થશે
નવી દિલ્હી તા.૨૨: ૨૦૨૬ની કૈલાસ માનસરોવરની યાત્રા માટે જેમણે પણ રજિસ્ટ્રેશન કરાવ્યું હતું એમના માટે ગઈ કાલે ભારતના વિદેશપ્રધાન એસ. જયશંકરે મોટી જાહેરાત કરી હતી. તેમણે કમ્પ્યુટર ડ્રો કરીને આ વર્ષે કૈલાસ માનસરોવરની યાત્રા કરનારા ૧૦૦૦ શ્રદ્ધાળુઓની ફાઇનલ યાદી જાહેર કરી હતી. આ વખતે યાત્રાળુઓની યાદી તૈયાર કરવા માટે સંપૂર્ણપણે નિષ્પક્ષ અને કમ્પ્યુટર-જનરેટેડ રેન્ડમ પ્રક્રિયા અપનાવવામાં આવી હતી. એમાં મહિલાઓ અને પુરુષોની સંખ્યાનું સંતુલન જાળવવા વિશે પણ ધ્યાન રખાયું હતું.
જૂનથી ઓગસ્ટ દરમ્યાન થનારી આ યાત્રામાં કુલ ૧૦૦૦ ભાગ્યશાળી યાત્રાળુઓની પસંદગી થઈ ચૂકી છે. આ તમામ યાત્રાળુઓને ૫૦ લોકોના કુલ ૨૦ બેચમાં મોકલવામાં આવશે. કૈલાસ માનસરોવર યાત્રાનો રૂટ અને અન્ય વિગતવાર માહિતી વેબસાઇટ પર અપલોડ થઈ ગઈ છે.
વિદેશ ખાતાના કહેવા મુજબ જે શ્રદ્ધાળુઓનું નામ લિસ્ટમાં સમાવાયું હશે તેમને મેસેજ અને ઈ-મેઇલના માધ્યમથી નોટિફિકેશન આપી દેવામાં આવ્યું છે. એ ઉપરાંત પણ જો કોઈ શ્રદ્ધાળુએ ચેક કરવું હોય તો http:/kmy.gov.in પર જઈને લોગ-ઇન કરીને પોતાનું સિલેક્શન સ્ટેટસ ચેક કરી શકે છે. રૂટ અને બેચને લઈને વિગતે માહિતી જોઈતી હોય તો હેલ્પલાઇન નંબર ૦૧૧-૨૩૦૮૮૨૧૪ નંબર પર કોલ કરીને ડાયરેક્ટ હેલ્પ મેળવી શકાશે. કમ્પ્યુટરના ડ્રોમાં તમારું નામ જે રૂટ અને જે બેચમાં સિલેક્ટ થયું છે એને બદલી નહીં શકાય. જો કોઈ બહુ જ મોટી મજબૂરી હોય અને ઠોસ કારણ હોય તો ગ્રુપ બદલવાની અરજી આપી શકો છો, પણ એ ત્યારે જ સ્વીકારાશે જો બીજા કોઈ ગ્રુપમાં સીટ ખાલી હશે.
આ વર્ષની યાત્રા માટે બે રૂટ નક્કી કરવામાં આવ્યા છે. એક લિપુલેખ પાસ અને બીજો નાથુ લા પાસ. શ્રદ્ધાળુઓ માટે હવે આ બન્ને રૂટ મોટરેબલ રસ્તાઓ ધરાવતા થઈ ગયા છે. એનો મતલબ એ કે હવે ભક્તોએ બહુ ઓછું પગપાળા ચાલવું પડશે. તેઓ ઇચ્છે તો આસાનીથી ગાડીઓ દ્વારા સફર પૂરી કરી શકશે. (કર્ટસીઃ કિશોર નથવાણી)
(3:02 PM IST)
છેલ્લા 8 દિવસમાં સૌથી લોકપ્રિય 
