મુંબઈ : મુંબઈગરાંની લાઈફલાઈન ગણાતી લોકલ ટ્રેનો હવે પ્રવાસીઓ માટે જોખમી સાબિત થઈ રહી છે અને અવારનવાર સર્જાતી દુર્ઘટનાઓને કારણે તે 'ડેથ લાઇન' બની રહી છે. છેલ્લા માત્ર ૨૪ કલાકની અંદર મધ્ય રેલવે માર્ગ પર બે અલગ-અલગ હૃદયદ્રાવક ઘટનાઓ સામે આવી છે, જેમાં કોપર અને દિવા રેલવે સ્ટેશન વચ્ચે ચાલતી ટ્રેનમાંથી નીચે પડી જવાથી એક મહિલાનું કરુણ મોત નીપજ્યું છે, જ્યારે બીજી ઘટનામાં વિક્રોલી અને ઘાટકોપર વચ્ચે રેલવે પાટા પાસેથી માથામાં ગંભીર ઈજા પામેલો એક અજાણ્યો યુવક મળી આવ્યો છે. આ દુર્ઘટનાઓને કારણે મુંબઈની લોકલ ટ્રેનોમાં પ્રવાસીઓની સુરક્ષા સામે ફરી એકવાર ગંભીર સવાલો ઊભા થયા છે.

પ્રથમ દુર્ઘટના વિશે પ્રાપ્ત વિગતો અનુસાર, કોપર અને દિવા સ્ટેશન વચ્ચે શુક્રવારે સવારે અંદાજે ૭:૪૫ વાગ્યાના અરસામાં આ કરુણ બનાવ બન્યો હતો. એક મહિલા મુસાફર અચાનક ચાલતી લોકલ ટ્રેનમાંથી નીચે પટકાઈ હતી, જેના કારણે ઘટનાસ્થળે જ તેનું કમકમાટીભર્યું મોત નીપજ્યું હતું. આ મામલે ડોમ્બિવલી રેલવે પોલીસ સ્ટેશનમાં સત્તાવાર રીતે ગુનો નોંધીને તપાસ હાથ ધરવામાં આવી છે. જોકે, મૃતક મહિલાની ઓળખ હજુ સુધી થઈ શકી નથી અને તે કયા સંજોગોમાં કે કેવી રીતે ટ્રેનમાંથી નીચે પડી તે દિશામાં પોલીસ ઝીણવટભરી તપાસ કરી રહી છે.

જ્યારે બીજી ઘટના વિક્રોલી અને ઘાટકોપર રેલવે સ્ટેશન વચ્ચે સવારે અંદાજે ૮:૩૫ વાગ્યે બની હતી. રેલવેના કર્મચારીઓને અપ લાઈન પર પાંચમી અને છઠ્ઠી રેલવે લાઈન વચ્ચે લોહીથી લથપથ અને માથામાં ગંભીર ઈજા પામેલો આશરે ૩૦ વર્ષની વયનો એક અજાણ્યો યુવક બેભાન હાલતમાં પડેલો નજરે પડ્યો હતો. આ ઘટનાની જાણ થતાં જ ટ્રેન મેનેજર દ્વારા તાત્કાલિક માનવતા દાખવીને ઈજાગ્રસ્ત યુવકને મદદ પૂરી પાડવામાં આવી હતી અને તેને ઘાટકોપર સ્ટેશનના ડેપ્યુટી સ્ટેશન માસ્ટરને સોંપવામાં આવ્યો હતો. આ બચાવ કામગીરી અને મદદ દરમિયાન મધ્ય રેલવેની લોકલ ટ્રેનોને સવારે ૮:૩૫ થી ૮:૪૯ સુધી એટલે કે લગભગ ૧૫ મિનિટ સુધી રોકી રાખવાની ફરજ પડી હતી, જેના લીધે રેલવે વ્યવહાર પણ થોડા સમય માટે ખોરવાયો હતો.

છેલ્લા ૨૪ કલાકમાં બનેલી આ બંને ગોઝારી ઘટનાઓએ મુંબઈગરાઓની દૈનિક મુસાફરી પાછળ રહેલા જોખમોને ઉજાગર કર્યા છે. રોજબરોજ લાખો મુસાફરોની ભીડ વચ્ચે દોડતી લોકલ ટ્રેનોમાં અતિશય ભીડભાડ, ફૂટબોર્ડ પર પ્રવાસ કરવાની મજબૂરી અને સુરક્ષાના અપૂરતા પગલાંઓને કારણે નિર્દોષ લોકોએ પોતાના પ્રાણ ગુમાવવા પડી રહ્યા છે. પોલીસ અને રેલવે પ્રશાસન દ્વારા આ મામલે ઊંડાણપૂર્વક તપાસ કરવામાં આવી રહી છે, પરંતુ પ્રવાસીઓની સુરક્ષા સુનિશ્ચિત કરવા માટે કડક અને નક્કર પગલાં લેવામાં નહીં આવે તો આવી દુર્ઘટનાઓ અટકાવવી મુશ્કેલ બનશે.