નોઈડા:  ઉત્તર પ્રદેશના શો-વિન્ડો ગણાતા નોઈડા (ગૌતમ બુદ્ધ નગર) માં કાયદો અને વ્યવસ્થા જાળવી રાખવા માટે વહીવટીતંત્રે મોટો નિર્ણય લીધો છે. તાજેતરમાં ઔદ્યોગિક વિસ્તારોમાં કામદારો દ્વારા કરવામાં આવેલા ઉગ્ર વિરોધ પ્રદર્શન અને ત્યારબાદ સર્જાયેલી હિંસક પરિસ્થિતિને ધ્યાનમાં રાખીને પોલીસ કમિશનરેટે સમગ્ર જિલ્લામાં ભારતીય નાગરિક સુરક્ષા સંહિતા (BNSS), ૨૦૨૩ ની કલમ ૧૬૩ (જે અગાઉ કલમ ૧૪૪ તરીકે ઓળખાતી હતી) લાગુ કરી દીધી છે. આ આદેશ આજથી એટલે કે ૩૦ એપ્રિલથી લઈને ૮ મે સુધી અમલી રહેશે, જે દરમિયાન જાહેર સ્થળોએ કોઈપણ પ્રકારની અશાંતિ ફેલાવનારાઓ સામે કડક કાર્યવાહી કરવામાં આવશે.

પોલીસ દ્વારા જાહેર કરવામાં આવેલી માર્ગદર્શિકા મુજબ, આ સમયગાળા દરમિયાન જિલ્લામાં પાંચ કે તેથી વધુ વ્યક્તિઓના એકઠા થવા પર, કોઈપણ પ્રકારના સરઘસ કાઢવા પર કે વિરોધ પ્રદર્શન કરવા પર સંપૂર્ણ પ્રતિબંધ લાદવામાં આવ્યો છે. વહીવટીતંત્રને શંકા છે કે અસામાજિક તત્વો કામદારોના આંદોલનની આડમાં શાંતિ ભંગ કરી શકે છે. આથી, દિલ્હી-નોઈડા બોર્ડરથી લઈને ઈન્ડસ્ટ્રિયલ હબ સુધીના તમામ સંવેદનશીલ વિસ્તારોમાં વધારાની પોલીસ ફોર્સ તૈનાત કરી દેવામાં આવી છે. ડ્રોન કેમેરા અને સીસીટીવી દ્વારા દરેક ગતિવિધિ પર ચાંપતી નજર રાખવામાં આવી રહી છે.

નોઈડા પોલીસ કમિશનરેટે સ્પષ્ટ કર્યું છે કે આ આદેશનું ઉલ્લંઘન કરનાર વ્યક્તિ સામે ભારતીય ન્યાય સંહિતાની સંબંધિત કલમો હેઠળ ગુનો નોંધવામાં આવશે. ખાસ કરીને સોશિયલ મીડિયા પર અફવા ફેલાવનારા અને ઉશ્કેરણીજનક પોસ્ટ કરનારા લોકો પર સાયબર સેલ નજર રાખી રહ્યું છે. સ્થાનિક રહેવાસીઓને અને ઉદ્યોગપતિઓને સહકાર આપવાની અપીલ કરવામાં આવી છે જેથી કરીને જિલ્લાની આર્થિક પ્રવૃત્તિઓ પર માઠી અસર ન પડે અને ફરીથી કોઈ હિંસક ઘટના ન બને. આગામી એક સપ્તાહ સુધી નોઈડા પોલીસ હાઈ એલર્ટ મોડ પર રહેશે.