લંડન | તા. 27: ઉત્તર-પશ્ચિમ લંડનના ગોલ્ડર્સ ગ્રીન વિસ્તારમાં બુધવારે સવારે એક ભયાનક અગ્નિ દુર્ઘટના સર્જાઈ હતી. લંડનના સૌથી જાણીતા અને મોટા યહૂદી કરિયાણાના સ્ટોર 'કોશેર કિંગડમ'માં અચાનક આગ ફાટી નીકળતા સમગ્ર વિસ્તારમાં કાળા ધુમાડાના ગોટેગોટા છવાઈ ગયા હતા. આગ એટલી વિકરાળ હતી કે તેને કાબૂમાં લેવા માટે લંડન ફાયર બ્રિગેડના ૧૫ ફાયર એન્જિન અને લગભગ ૧૦૦ થી વધુ અગ્નિશામકોને તાત્કાલિક ઘટનાસ્થળે તૈનાત કરવા પડ્યા હતા. હાલમાં, આ આગ કેવી રીતે લાગી તે રહસ્ય છે અને અધિકારીઓ તેની ઝીણવટભરી તપાસ કરી રહ્યા છે.
સમગ્ર પંથકમાં ભયનું વાતાવરણ
ગોલ્ડર્સ ગ્રીન વિસ્તાર યહૂદી સમુદાયનું મુખ્ય કેન્દ્ર માનવામાં આવે છે. આ ઘટનાએ સ્થાનિક લોકોમાં ભારે ચિંતા જન્માવી છે, કારણ કે છેલ્લા કેટલાક મહિનાઓથી આ વિસ્તારમાં યહૂદી ધર્મસ્થાનો અને સમુદાયના સ્થળો પર હુમલાઓની શ્રેણી જોવા મળી છે. ખાસ કરીને એપ્રિલના અંતમાં બે યહૂદી પુરુષો પર થયેલા ઘાતક છરીના હુમલાની ઘટના બાદ, સ્થાનિકોમાં પહેલાથી જ ભયનો માહોલ છે. જોકે, હાલની આગ માટે કોઈ ચોક્કસ જૂથ કે કારણની સત્તાવાર પુષ્ટિ કરવામાં આવી નથી, પરંતુ ઈરાન સાથે જોડાયેલા એક જૂથ 'હરકત અશબ અલ-યામીન અલ-ઇસ્લામીયા' (HAYI) નું નામ અગાઉની ઘણી ઘટનાઓમાં લેવાયું હોવાથી પોલીસની તપાસ તે દિશામાં પણ કેન્દ્રિત છે.
વહીવટીતંત્રની કડક કાર્યવાહી
આ ઘટના બાદ મેટ્રોપોલિટન પોલીસે સુરક્ષા વ્યવસ્થા સજ્જ કરી દીધી છે. પોલીસ પ્રવક્તાએ જણાવ્યું હતું કે, "અમે અત્યારે આગને ઓલવવા અને જનતાની સલામતી સુનિશ્ચિત કરવા પર સંપૂર્ણ ધ્યાન આપી રહ્યા છીએ." સ્થાનિક લોકોને ભારે ધુમાડાને કારણે બારીઓ બંધ રાખવા અને આ વિસ્તારને ટાળવા માટે અપીલ કરવામાં આવી છે. લંડન પોલીસ દ્વારા તાજેતરમાં જ રચવામાં આવેલી નવી "સમુદાય સુરક્ષા ટીમ", જેમાં 100 વધારાના અધિકારીઓનો સમાવેશ થાય છે, તે પણ આ મામલાની તપાસમાં જોડાઈ ગઈ છે. આ ઘટનાએ ફરી એકવાર લંડનમાં વસતા લઘુમતી સમુદાયોની સુરક્ષા અને અગ્નિશામક ક્ષમતાઓના મુદ્દાને વૈશ્વિક ચર્ચાના સ્તરે લાવી દીધો છે.