મુંબઈ:હવામાન વિશ્લેષકોના જણાવ્યા અનુસાર, બંગાળની ખાડી પર સક્રિય થયેલું મજબૂત લો-પ્રેશર (હવાનું હળવું દબાણ) પશ્ચિમ દિશા તરફ આગળ વધીને હાલ ભુવનેશ્વરની ઉત્તરે સ્થિત થયું છે. આ સિસ્ટમ આગામી બે દિવસ દરમિયાન ઉત્તર-પશ્ચિમ દિશા તરફ આગળ વધે તેવી પ્રબળ શક્યતા છે. તેની સાથે જોડાયેલું સાયક્લોનિક સર્ક્યુલેશન સરેરાશ દરિયાઈ સપાટીથી આશરે ૭.૬ કિલોમીટરની ઊંચાઈ સુધી વિસ્તરેલું છે, જેના કારણે પૂર્વ અને મધ્ય ભારતના અનેક ભાગોમાં વ્યાપક વરસાદી માહોલ જળવાઈ રહેશે.

આ સિસ્ટમની અસરને પગલે આગામી ૩૬ થી ૪૮ કલાક દરમિયાન ઓડિશા, ઉત્તર આંધ્રપ્રદેશ, પશ્ચિમ બંગાળ, છત્તીસગઢ, ઝારખંડ અને પૂર્વીય ઉત્તર પ્રદેશના કેટલાક વિસ્તારોમાં મધ્યમથી ભારે વરસાદ પડવાની સંભાવના વ્યક્ત કરવામાં આવી છે.

ગુજરાત પર શું અસર થશે?

હાલના તબક્કે આ લો-પ્રેશર સિસ્ટમ ગુજરાતથી ઘણી દૂર હોવાથી રાજ્યના હવામાન પર તેની કોઈ સીધી અસર જોવા મળશે નહીં. જો કે, આ સિસ્ટમ સાથે જોડાયેલી ટ્રફ લાઇન મધ્ય ભારત સુધી લંબાયેલી હોવાથી આગામી દિવસોમાં આ ક્ષેત્રમાં ભેજનું પ્રમાણ જાળવી રાખવામાં મદદ મળશે. હાલમાં ગુજરાતમાં વરસાદનો આધાર મુખ્યત્વે સ્થાનિક હવામાનના પરિબળો, અપર-એર સાયક્લોનિક સર્ક્યુલેશન અને મોન્સૂન ટ્રફની સ્થિતિ પર રહેશે. અત્યારે રાજ્યમાં વરસાદ લાવે તેવી કોઈ મોટી સિસ્ટમ સીધી રીતે સક્રિય ન હોવાથી સાર્વત્રિક ભારે વરસાદની કોઈ શક્યતા નથી.

આગામી દિવસોમાં વાતાવરણ બદલાવાની આશા:

હવામાન વિભાગના જણાવ્યા મુજબ, દક્ષિણ-પશ્ચિમ રાજસ્થાન અને તેને અડીને આવેલા કચ્છ પર એક અપર-એર સાયક્લોનિક સર્ક્યુલેશન હજુ પણ સક્રિય છે. આ ઉપરાંત, આગામી ૧૯ જુલાઈથી ઉત્તર-પશ્ચિમ ભારતમાં એક નવું વેસ્ટર્ન ડિસ્ટર્બન્સ સક્રિય થવાની સંભાવના છે. જો આ બંને હવામાન સિસ્ટમ સાનુકૂળ રીતે એકબીજા સાથે પ્રતિક્રિયા કરશે, તો આગામી દિવસોમાં ગુજરાતના વરસાદના ચિત્રમાં મોટો સાનુકૂળ ફેરફાર જોવા મળી શકે છે. હાલ પૂરતું, ગુજરાતમાં માત્ર છૂટાછવાયા વિસ્તારોમાં સ્થાનિક સ્તરે હળવા ઝાપટાં ચાલુ રહેશે, જ્યારે પૂર્વ અને મધ્ય ભારતમાં વ્યાપક અને ભારે વરસાદ ખાબકશે.