નવી દિલ્હી: ઈરાનના દરિયાઈ વિસ્તારમાંથી પસાર થઈ રહેલા એક એલપીજી (LPG) કમર્શિયલ ટેન્કર પર શુક્રવારે હુમલો થયો હોવાની ગંભીર ઘટના સામે આવી છે. આ મોઝામ્બિકના ધ્વજ ધરાવતા જહાજ પર કુલ ૨૮ ભારતીય નાગરિકો સવાર હતા. શુક્રવારે મોડી રાત્રે તેહરાન સ્થિત ભારતીય દૂતાવાસ (એમ્બેસી ઓફ ઈન્ડિયા) દ્વારા જારી કરવામાં આવેલા અધિકૃત નિવેદન અનુસાર, આ હુમલામાં જહાજ પરના તમામ ૨૮ ભારતીય ક્રૂ સભ્યો સંપૂર્ણપણે સુરક્ષિત છે.

દૂતાવાસે સ્થિતિ પર નજર રાખી તંત્ર સાથે સાધ્યો સંપર્ક:

તેહરાન સ્થિત ભારતીય દૂતાવાસે જારી કરેલી અખબારી યાદી મુજબ, હુમલાની ઘટના બનતાની સાથે જ દૂતાવાસ દ્વારા ઈરાનના સંબંધિત સત્તામંડળો અને સ્થાનિક ઓથોરિટીઝ સાથે તાત્કાલિક અને સતત સંપર્ક જાળવી રાખવામાં આવ્યો છે. દૂતાવાસે જણાવ્યું છે કે તેઓ સમગ્ર પરિસ્થિતિ પર ખૂબ જ નજીકથી મોનિટરિંગ કરી રહ્યા છે જેથી ભારતીય ક્રૂ સભ્યોની સુરક્ષા સુનિશ્ચિત કરી શકાય.

યુદ્ધના માહોલ વચ્ચે ભારતીય નાવિકોની સુરક્ષા વધારી:

છેલ્લા કેટલાક મહિનાઓથી ચાલી રહેલી પ્રાદેશિક અશાંતિ અને પરિસ્થિતિના કારણે દરિયાઈ માર્ગો પર ભારતીય નાવિકો (સીફેઅરર્સ)ની સુરક્ષાને લઈને ગંભીર ચિંતા ઊભી થઈ છે. અગાઉ પણ દરિયાઈ વિસ્તારોમાં બનેલી ઘટનાઓમાં કેટલાક નાવિકોના મોત થયાના અહેવાલો આવ્યા હતા. આ સ્થિતિ વચ્ચે ૨૮ ભારતીય નાગરિકો સલામત હોવાના સમાચારથી તેમના પરિવારો અને દેશવાસીઓએ મોટી રાહત અનુભવી છે. દૂતાવાસે સ્પષ્ટ કર્યું છે કે ભારતીય નાવિકોની મદદ અને સુરક્ષા માટે તમામ જરૂરી પગલાં લેવામાં આવી રહ્યા છે.