લખનૌ: ઉત્તર પ્રદેશમાં સતત વધી રહેલા નદીઓના જળસ્તરને કારણે વારાણસી અને કાનપુર સહિત અનેક જિલ્લાઓમાં પૂર જેવી ગંભીર સ્થિતિ સર્જાઈ છે, જેના પરિણામે હજારો નાગરિકોનું જનજીવન ગંભીર રીતે પ્રભાવિત થયું છે.

રાજ્યના સંત કબીર નગર, કુશીનગર, વારાણસી, બલિયા, ઉન્નાવ, કાનપુર, લખનૌ વિભાગ અને આગ્રા સહિતના વિસ્તારોમાં નદીઓના પૂરના પાણી વસ્તીવાળા વિસ્તારો અને ઘરોમાં ફરી વળ્યા છે. નીચાણવાળા વિસ્તારોમાં રહેતા લોકો ભયના સાયાયા હેઠળ જીવી રહ્યા છે અને સલામત સ્થળોએ સ્થળાંતર કરવાની ફરજ પડી રહી છે. આ કુદરતી આફતના કારણે ખેતરોમાં ઊભેલો પાક પાણીમાં ડૂબી જવાથી ખેડૂતોને વ્યાપક આર્થિક નુકસાન વેઠવાનો વારો આવ્યો છે.

આ ગંભીર પરિસ્થિતિને ધ્યાનમાં રાખીને વહીવટી તંત્ર દ્વારા અસરગ્રસ્ત વિસ્તારોમાં રાહત અને બચાવ કામગીરી યુદ્ધના ધોરણે શરૂ કરવામાં આવી છે. વહીવટી ટીમો દ્વારા સતત સ્થળ નિરીક્ષણ કરવામાં આવી રહ્યું છે અને નાગરિકોને સુરક્ષિત સ્થાનો પર પહોંચાડવા માટે ખાસ વ્યવસ્થાઓ ગોઠવવામાં આવી રહી છે. કેટલાક વિસ્તારોમાં નદીનું પાણી સ્થિર થવાના સંકેતો મળ્યા છે, જેના કારણે સ્થાનિક વહીવટી તંત્ર દ્વારા થોડી રાહત અનુભવાઈ રહી છે.

ભૂતકાળની પૂરની સ્થિતિમાંથી બોધપાઠ લઈને સરકારે નીચાણવાળા ક્ષેત્રોમાં અગાઉથી જ એલર્ટ જાહેર કર્યું છે. આગામી સમયમાં નુકસાનના સર્વે બાદ અસરગ્રસ્ત ખેડૂતો અને પરિવારોને યોગ્ય વળતર ચૂકવવાની પ્રક્રિયા હાથ ધરવામાં આવશે. પ્રશાસન દ્વારા લોકોને અફવાઓથી દૂર રહેવા અને સુરક્ષિત માર્ગોનો ઉપયોગ કરવા અપીલ કરવામાં આવી છે.