લખનૌ : સીએમ યોગી આદિત્યનાથે ઉત્તર પ્રદેશના યુવાનો માટે રોજગારીનો પિટારો ખોલતા આગામી એક વર્ષમાં ૧.૫ લાખ સરકારી નોકરીઓ આપવાની ઐતિહાસિક જાહેરાત કરી છે. આ અભિયાન અંતર્ગત પોલીસ, શિક્ષણ, મહેસૂલ અને આરોગ્ય જેવા મહત્વના વિભાગોમાં ખાલી પડેલી જગ્યાઓ યુદ્ધના ધોરણે ભરવામાં આવશે. સરકારે સ્પષ્ટ કર્યું છે કે આ ભરતી પ્રક્રિયા માત્ર સંખ્યા વધારવા માટે નહીં, પરંતુ રાજ્યના વહીવટી માળખાને વધુ મજબૂત અને કાર્યક્ષમ બનાવવા માટે કરવામાં આવી રહી છે.

આ મેગા ભરતીમાં સૌથી મોટો હિસ્સો પોલીસ અને શિક્ષણ ક્ષેત્રનો રહેશે, જેમાં અંદાજે ૧ લાખ જેટલા ઉમેદવારોની પસંદગી કરવામાં આવશે. પોલીસ વિભાગમાં કોન્સ્ટેબલથી લઈને સબ-ઇન્સ્પેક્ટર સુધીની ભરતી દ્વારા કાયદો અને વ્યવસ્થા વધુ સઘન બનાવવાનું લક્ષ્ય છે. મુખ્યમંત્રીએ વિવિધ ભરતી બોર્ડ અને કમિશનને કડક આદેશ આપ્યા છે કે તમામ નિમણૂકો નિર્ધારિત સમયમર્યાદામાં પૂર્ણ કરવામાં આવે, જેથી તૈયારી કરી રહેલા યુવાનોનો સમય અને મહેનત એળે ન જાય.

ભરતી પ્રક્રિયાને લઈને સરકારનો અભિગમ અત્યંત કડક છે. કોઈ પણ પ્રકારની છેતરપિંડી કે ગેરરીતિ રોકવા માટે વિશેષ દેખરેખ રાખવામાં આવશે. સીએમ યોગીએ ચેતવણી આપી છે કે જો કોઈ ભરતીમાં ભ્રષ્ટાચાર કરવાનો પ્રયાસ કરશે તો તેમની મિલકત જપ્ત કરવા સુધીના કડક પગલાં લેવામાં આવશે. આ પારદર્શિતાના વાયદા સાથે યુપી સરકાર ૨૦૨૬ સુધીમાં રાજ્યના લાખો પરિવારોમાં ખુશી લાવવા અને આર્થિક વિકાસને વેગ આપવા માટે સજ્જ થઈ છે.