લખનૌ, તા.૦૧: અયોધ્યા શ્રી રામ જન્મભૂમિ તીર્થ ક્ષેત્ર ટ્રસ્ટના પ્રમુખ અને રામ મંદિર આંદોલનના પ્રણેતા મહંત નૃત્ય ગોપાલ દાસ મહારાજની તબિયત અચાનક બગડતાં તેમને લખનૌની મેદાંતા હોસ્પિટલમાં દાખલ કરવામાં આવ્યા છે. ફેફસાં અને પેશાબની નળીઓમાં ગંભીર ચેપ (ઇન્ફેક્શન) લાગવાને કારણે સોમવારે મોડી રાત્રે તેમને અયોધ્યાથી લખનૌ રિફર કરાયા હતા, જ્યાં હાલ તેઓ આઈસીયુ (ICU) માં સારવાર હેઠળ છે.
તબિયતમાં ધીમો પણ સંતોષકારક સુધારો
મેદાંતા હોસ્પિટલના મેડિકલ ડિરેક્ટર ડૉ. રાકેશ કપૂરે બુધવારે હેલ્થ બુલેટિન જાહેર કરતા જણાવ્યું કે, "મહારાજશ્રીની સ્થિતિ હાલ સ્થિર અને સંતોષકારક છે. નિષ્ણાત ડોક્ટરોની સઘન સારવાર બાદ તેમની તબિયતમાં સુધારો જોવા મળી રહ્યો છે." જોકે, ચેપની ગંભીરતાને જોતાં ક્રિટિકલ કેર મેડિસિન, પલ્મોનરી મેડિસિન અને યુરોલોજી વિભાગના ટોચના ડોક્ટરોની ટીમ તેમના પર સતત નજર રાખી રહી છે. ડોક્ટરોના જણાવ્યા અનુસાર, તેમને હજુ ૪ થી ૫ દિવસ હોસ્પિટલમાં જ રાખવામાં આવશે.
મુખ્યમંત્રી યોગી આદિત્યનાથ પણ ચિંતિત, સલાહકારે લીધી મુલાકાત
૮૮ વર્ષીય વયોવૃદ્ધ સંતની તબિયત બગડવાના સમાચાર મળતા જ ઉત્તર પ્રદેશના રાજકીય અને ધાર્મિક જગતમાં ચિંતાનું મોજું ફરી વળ્યું છે. મુખ્યમંત્રી યોગી આદિત્યનાથના મુખ્ય સલાહકાર અવનીશ કુમાર અવસ્થી બુધવારે તાબડતોબ મેદાંતા હોસ્પિટલ પહોંચ્યા હતા. તેમણે મહારાજશ્રીની મુલાકાત લઈ તેમના ખબર-અંતર પૂછ્યા હતા અને ડોક્ટરો સાથે લાંબી ચર્ચા કરીને શ્રેષ્ઠ સારવાર આપવા નિર્દેશ કર્યો હતો.
રામ મંદિર નિર્માણ માટે સમર્પિત રહ્યું છે જીવન
મહંત નૃત્ય ગોપાલ દાસ માત્ર એક સંત નથી, પરંતુ અયોધ્યા રામ મંદિર ચળવળનો સૌથી મોટો ચહેરો છે. ૧૯૮૬માં રામ જન્મભૂમિ મુક્તિ યજ્ઞ સમિતિના ઉપપ્રમુખ પદથી શરૂ કરીને ૨૦૦૬માં વિશ્વ હિન્દુ પરિષદ દ્વારા રચિત રામ જન્મભૂમિ ટ્રસ્ટના વડા બનવા સુધી, તેમણે પોતાનું આખું જીવન રામલલાના ભવ્ય મંદિર માટે હોમી દીધું છે. હાલમાં તેઓ સત્તાવાર સરકારી ટ્રસ્ટ (શ્રી રામ જન્મભૂમિ તીર્થ ક્ષેત્ર) ના પ્રમુખ છે. અયોધ્યામાં થયેલા ઐતિહાસિક શિલાન્યાસથી લઈને રામલલાના નૂતન વિગ્રહની પ્રાણ પ્રતિષ્ઠા મહોત્સવ સુધીની સમગ્ર સનાતની યાત્રામાં તેમની ભૂમિકા મુખ્ય રહી છે. અગાઉ પણ વય સંબંધિત બીમારીઓને કારણે તેઓ હોસ્પિટલમાં દાખલ થઈ ચૂક્યા છે, ત્યારે દેશભરના ભક્તો હાલ તેમના ઝડપી સ્વાસ્થ્ય લાભ માટે પ્રાર્થના કરી રહ્યા છે.