પટના:  બિહાર લોકસેવા આયોગ (BPSC) દ્વારા ચોથા તબક્કાની શિક્ષક ભરતી (TRE 4) નું જાહેરનામું બહાર પાડવામાં વિલંબ થતા પટનાની સડકો પર ભારે અરાજકતા સર્જાઈ છે. શુક્રવારે હજારોની સંખ્યામાં શિક્ષક ઉમેદવારોએ શિક્ષણ મંત્રીના આવાસ તરફ કૂચ કરી હતી, પરંતુ જેપી ગોલંબર પાસે પોલીસે તેમને રોકવા માટે લાઠીચાર્જ કરતા સ્થિતિ તંગ બની ગઈ હતી. નવાઈની વાત એ છે કે, સાંજે આવેલા ભારે વાવાઝોડા અને વરસાદમાં ભીંજાયા હોવા છતાં આંદોલનકારીઓ રસ્તા પરથી હટવા તૈયાર નથી.
આંદોલન કરી રહેલા યુવાનોએ સ્પષ્ટ શરત મૂકી છે કે જ્યાં સુધી તેમના નેતા દિલીપ કુમારને પોલીસ મુક્ત નહીં કરે ત્યાં સુધી તેઓ કોઈ પણ પ્રકારની મધ્યસ્થી કે વાટાઘાટો કરશે નહીં. દિલીપ કુમારની અટકાયતથી રોષે ભરાયેલા ઉમેદવારો રસ્તા પર જ બેસી ગયા છે અને 'દિલીપ કુમારના નેતૃત્વમાં જ વાતચીત થશે' તેવો હઠાગ્રહ રાખ્યો છે. બીજી તરફ, બિહારના નવા શિક્ષણ મંત્રી મિથિલેશ તિવારીએ આજે જ પદભાર સંભાળતાની સાથે જ આશ્વાસન આપ્યું છે કે TRE 4 ની ભરતી પ્રક્રિયા ટૂંક સમયમાં શરૂ કરવામાં આવશે.
આ આંદોલન હવે રાજકીય વળાંક લઈ રહ્યું છે. વિપક્ષી નેતા તેજસ્વી યાદવે સરકાર પર પ્રહાર કરતા સોશિયલ મીડિયા પર લખ્યું કે, "સરકાર પોતાના બાળકોને મંત્રી બનાવી રહી છે અને નોકરી માંગતા યુવાનો પર લાઠીઓ વરસાવી રહી છે." બીજી તરફ, કેન્દ્રીય મંત્રી ચિરાગ પાસવાને પણ લાઠીચાર્જની ટીકા કરી છે, જોકે તેમણે ઉમેદવારોને ધીરજ ધરવા વિનંતી કરી છે કારણ કે મંત્રીમંડળનું વિસ્તરણ હજુ ગઈકાલે જ થયું છે.
રાજ્યમાં શિક્ષકોની અંદાજે ૪૬,૫૯૫ જેટલી જગ્યાઓ ખાલી છે, જેના માટે એપ્રિલ મહિનામાં જ જાહેરાત આવવાની હતી. સરકારે વિધાનસભા ચૂંટણી પહેલા મોટી ભરતીનો વાયદો કર્યો હતો, પરંતુ અમલીકરણમાં થતા વિલંબથી શિક્ષિત બેરોજગારોમાં ભારે રોષ જોવા મળી રહ્યો છે. હાલમાં પટનાના જેપી ગોલંબર પર ભારે પોલીસ બંદોબસ્ત તૈનાત છે અને સ્થિતિ પર વહીવટીતંત્ર સતત નજર રાખી રહ્યું છે.