મુંબઈ : દેશની આર્થિક રાજધાની મુંબઈના સૌથી વ્યસ્ત અને ઐતિહાસિક છત્રપતિ શિવાજી મહારાજ ટર્મિનસ (સીએસએમટી) રેલવે સ્ટેશન પર મુસાફરોની સુરક્ષાને ગંભીર નુકસાન પહોંચાડતી એક દુર્ઘટના સામે આવી છે. પ્રાપ્ત વિગતો અનુસાર, ગુરુવારે મોડી રાત્રે અંદાજે ૧૦:૦૫ વાગ્યે સ્ટેશનના બુકિંગ હોલના પ્રવેશદ્વાર પાસે અચાનક છતનો એક ભાગ તૂટીને નીચે પડ્યો હતો, જેના કારણે ત્યાંથી પસાર થઈ રહેલા બે મુસાફરો અચાનક આ દુર્ઘટનાનો ભોગ બન્યા હતા. આ ઘટનાએ સ્ટેશન પર ચાલી રહેલા બાંધકામ અને જાળવણીના કાર્યો દરમિયાન સલામતીના ધોરણો સામે મોટા પ્રશ્નાર્થ ચિહ્નો ખડા કર્યા છે.

ઘટનાની વિગતો મુજબ, સીએસએમટી સ્ટેશન પર રેલ લેન્ડ ડેવલપમેન્ટ ઓથોરિટી (RLDA) દ્વારા છેલ્લા કેટલાક સમયથી પુનર્વિકાસ (Redevelopment) અને સુંદરતા તેમજ જાળવણીના વ્યાપક કાર્યો હાથ ધરવામાં આવી રહ્યા છે. આ પ્રોજેક્ટ અંતર્ગત સ્ટેશનની અંદર આવેલી કચેરીઓ અને પ્લેટફોર્મ ડેકના વિસ્તરણ તથા સુધારણાની કામગીરી ચાલી રહી છે. આ જ બાંધકામ ક્ષેત્રની નજીક બનેલી આ દુર્ઘટનામાં વિનાયક હટકર (૨૮) અને અયાન માતવણકર (૨૪) નામના બે યુવકો ગંભીર રીતે ઘાયલ થયા હતા. અકસ્માત બાદ તરત જ બંને ઘાયલોને સારવાર માટે સ્ટેશન નજીક આવેલી સરકારી સેન્ટ જ્યોર્જ હોસ્પિટલના ઇમરજન્સી વોર્ડમાં ખસેડવામાં આવ્યા હતા. હોસ્પિટલના ડૉક્ટરો દ્વારા પ્રાપ્ત માહિતી મુજબ, વિનાયક હટકરના માથા પર ગંભીર ઇજા થવાને કારણે ટાંકા લેવા પડ્યા છે, જ્યારે અયાન માતવણકરની ડાબી આંખની પાંપણ પાસે ઊંડો ઘા પડ્યો છે અને જમણા પગના ઘૂંટણ પર ભારે સોજો આવી ગયો છે.

ઉલ્લેખનીય છે કે સીએસએમટી મુંબઈનું અત્યંત વ્યસ્ત રેલવે સ્ટેશન છે, જ્યાંથી દરરોજ લાખોની સંખ્યામાં લોકલ ટ્રેનો અને મેલ-એક્સપ્રેસના મુસાફરો અવરજવર કરે છે. આટલી મોટી સંખ્યામાં જનમેદની સતત ધમધમતી રહેતી હોય તેવા વિસ્તારમાં પ્રવાસીઓની સુરક્ષાને તાત્કાલિક ધ્યાનમાં રાખ્યા વિના બેદરકારીપૂર્વક ચાલતા બાંધકામ સામે ગંભીર સવાલો ઉઠી રહ્યા છે. આ ઘટનાથી માત્ર થોડા દિવસો પહેલા જ સીએસએમટી સ્ટેશનની બહાર એક જર્જરિત ઈમારતની દીવાલ તૂટી પડવાની ઘટના બની હતી, જેમાં સદભાગ્યે કોઈ જાનહાનિ થઈ નહોતી પરંતુ વાહનોને નુકસાન પહોંચ્યું હતું. વારંવાર બની રહેલી આવી દુર્ઘટનાઓ રેલવે પ્રશાસનની સુરક્ષા વ્યવસાની પોલ ખોલી નાખે છે.

રોજરોજ લાખો મુસાફરોના જીવ જોખમમાં મૂકીને ચાલતા આવા વિકાસ કાર્યો સામે હવે કડક પગલાં લેવામાં આવે અને જવાબદાર એજન્સીઓ સામે યોગ્ય તપાસ થાય તેવી માંગ પ્રવાસીઓ અને મુસાફર સંગઠનો દ્વારા જોરશોરથી ઉઠાવવામાં આવી રહી છે.