મુંબઈ : મુંબઈના ગોરેગાંવ પશ્ચિમ સ્થિત આરે મેટ્રો સ્ટેશનની બિલકુલ નીચે એક બસમાં અચાનક ભીષણ આગ ફાટી નીકળતાં સમગ્ર વિસ્તારમાં ભારે ગભરાટ અને અફરાતફરીનો માહોલ સર્જાયો હતો. આ ઘટનાને પગલે સાવચેતીના ભાગરૂપે મેટ્રો ટ્રેનની કામગીરી થોડા સમય માટે ખોરવાઈ ગઈ હતી, પરંતુ રાહતના સમાચાર એ છે કે આ દુર્ઘટનામાં કોઈ ઈજા કે જાનહાનિના અહેવાલ નથી.

જોરદાર ધડાકા સાથે બસ આગની લપેટમાં આવી:

પ્રત્યક્ષદર્શીઓના જણાવ્યા અનુસાર, ચાલુ બસમાંથી અચાનક ભારે ધુમાડો નીકળવાનું શરૂ થયું હતું અને જોતજોતામાં બસ આખી આગની જ્વાળાઓમાં લપેટાઈ ગઈ હતી. આ દરમિયાન ધડાકા જેવો જોરદાર અવાજ પણ સંભળાયો હતો, જેના કારણે રસ્તા પરથી પસાર થતા વાહનચાલકો અને રાહદારીઓમાં ભાગદોડ મચી ગઈ હતી. આગ કયા કારણોસર લાગી તે અંગેનું ચોક્કસ કારણ હજુ સુધી જાણી શકાયું નથી.

ફાયર બ્રિગેડની તાત્કાલિક કામગીરી:

ઘટનાની જાણ થતાં જ ફાયર બ્રિગેડની ગાડીઓ અને સ્થાનિક પોલીસનો કાફલો સ્થળ પર પહોંચી ગયો હતો. અગ્નિશામક દળે સમયસૂચકતા વાપરીને આગ પર કાબૂ મેળવી લીધો હતો. મેટ્રો સ્ટેશનની નજીક જ આ બનાવ બન્યો હોવાથી સુરક્ષાના કારણોસર મેટ્રો સેવાઓ પણ થોડી મિનિટો માટે સ્થગિત કરી દેવામાં આવી હતી, જેને સ્થિતિ સામાન્ય થતાં ફરી પૂર્વવત કરી દેવાઈ હતી.