તા. 20, જુલાઈ 2026: ચેન્નઈ: તમિલનાડુના રાજકારણમાં હાલમાં જોરદાર ગરમાવો આવી ગયો છે. તાજેતરની વિધાનસભા ચૂંટણીમાં ભવ્ય વિજય મેળવીને સત્તાના સિંહાસને બેઠેલા મુખ્યમંત્રી અને TVK (તમિલગા વેટ્ટ્રી કઝગમ) ના સ્થાપક સી. જોસેફ વિજય (થલાપતિ વિજય) વિરુદ્ધ અપમાનજનક અને હિંસક ટિપ્પણી કરવાના મામલે વિપક્ષી પક્ષ DMK ના ધારાસભ્ય માર્કંડેયનની ધરપકડ કરવામાં આવી છે. આ ધરપકડ બાદ બંને પક્ષોના કાર્યકરો વચ્ચે તણાવ ચરમસીમાએ પહોંચી ગયો છે.
જાહેર મંચ પરથી આપી હતી ધમકી
મળતી માહિતી મુજબ, થુથુકુડી જિલ્લાના કોવિલપટ્ટીમાં ડીએમકે દ્વારા આયોજિત એક ધન્યવાદ સભા દરમિયાન વિલાથીકુલમ મતવિસ્તારના ધારાસભ્ય માર્કંડેયને પિત્તો ગુમાવ્યો હતો. તેમણે પક્ષના કાર્યકરોને સંબોધતા મુખ્યમંત્રી વિજય વિરુદ્ધ અત્યંત ઉશ્કેરણીજનક ભાષાનો ઉપયોગ કર્યો હતો અને 'હું તેના હાડકાં તોડી નાખીશ' તેવી સીધી ધમકી આપી હતી. આ ભાષણનો વીડિયો સોશિયલ મીડિયા પર વાયરલ થતાં જ ચોતરફ ભારે હોબાળો મચી ગયો હતો અને લોકોએ આ હિંસક નિવેદનની આકરી ટીકા કરી હતી.
મધ્યરાત્રિએ પોલીસ એક્શન અને હંગામો
મુખ્યમંત્રી વિરુદ્ધની આ ધમકીને પગલે TVK ના એક કાર્યકર્તાએ પોલીસમાં ઔપચારિક ફરિયાદ નોંધાવી હતી. પરિસ્થિતિની ગંભીરતાને જોતા પોલીસે સોમવારે વહેલી સવારે જ ધારાસભ્ય માર્કંડેયનના વિલાથીકુલમ સ્થિત નિવાસસ્થાને દરોડો પાડી તેમની અટકાયત કરી લીધી હતી. આ સમાચાર વાયુવેગે ફેલાતા જ મોટી સંખ્યામાં ડીએમકે કાર્યકરો ધારાસભ્યના ઘર પાસે એકઠા થઈ ગયા હતા. ઉગ્ર બનેલા સમર્થકોએ પોલીસ વાહનને રોકવાનો અને પોલીસ સામે સૂત્રોચ્ચાર કરવાનો પ્રયાસ કર્યો હતો, જેના કારણે વાતાવરણ તંગ બની ગયું હતું. જોકે, સુરક્ષા દળોએ તાત્કાલિક હસ્તક્ષેપ કરી ભીડને વિખેરી નાખી હતી.
સાંસદનો વળતો પ્રહાર: 'સરકાર અસહિષ્ણુ બની છે'
આ ધરપકડના વિરોધમાં થુથુકુડીના ડીએમકે લોકસભા સાંસદે શાસક ટીવીકે સરકાર પર આકરા પ્રહારો કર્યા છે. તેમણે સોશિયલ મીડિયા પ્લેટફોર્મ 'X' પર રોષ ઠાલવતા લખ્યું કે, "ધારાસભ્ય માર્કન્ડેયનની નિર્દયતાથી કરવામાં આવેલી ધરપકડ અત્યંત નિંદનીય છે. વિજય સરકાર ટીકા સહન કરવામાં અસમર્થ છે અને ડીએમકેના સભ્યોને દબાવવા માટે પોલીસનો દુરુપયોગ કરી રહી છે. લોકશાહી માધ્યમથી આ સરકારને યોગ્ય પાઠ ભણાવવામાં આવશે." તેમણે ધારાસભ્યને તાત્કાલિક મુક્ત કરવાની માંગ કરી છે.
પોલીસ હાલમાં ધારાસભ્યની પૂછપરછ કરી રહી છે અને ટૂંક સમયમાં જ તેમને કોર્ટમાં રજૂ કરવામાં આવશે. બે દિગ્ગજ પક્ષો વચ્ચેની આ લડાઈ આગામી દિવસોમાં તમિલનાડુના રાજકારણને કઈ દિશામાં લઈ જાય છે, તેના પર સૌની નજર મંડાયેલી છે.