બેંગલુરુ : બુધવારે સાંજે મનીલાથી પલાવાન પ્રાંતના પ્રખ્યાત પર્યટન ટાપુ કોરોન તરફ જઈ રહેલી 'જૂન એસ્ટર' નામની પેસેન્જર ફેરીમાં કોરોન ટાપુ નજીક અચાનક ભીષણ આગ ફાટી નીકળતાં મોટો કરૂણાંત સર્જાયો હતો. આ જહાજ પર ૧૭ ક્રૂ સભ્યો સહિત કુલ ૧૩૨ લોકો સવાર હતા, જેમાં ઇમરજન્સી બચાવ કામગીરી દરમિયાન કોસ્ટ ગાર્ડે અત્યાર સુધીમાં ૭૬ લોકોના મૃતદેહ બહાર કાઢ્યા છે. આ ભયાનક દુર્ઘટનામાં ૪૩ મુસાફરો ચમત્કારિક રીતે બચી ગયા છે, જ્યારે હજુ પણ ૧૩ જેટલા લોકો ગુમ હોવાથી મૃત્યુઆંક વધવાની આશંકા સેવાઈ રહી છે.
ઘટનાની વિગતવાર માહિતી આપતા ફિલિપાઇન્સ કોસ્ટ ગાર્ડના પ્રવક્તા કોમોડોર નોમી કાયાબ્યાબે જણાવ્યું હતું કે દરિયામાં પ્રતિકૂળ પરિસ્થિતિઓ અને જોરદાર મોજાંઓના કારણે જહાજ તેના પ્રારંભિક સંકટસ્થળથી આશરે આઠ નોટિકલ માઇલ દૂર વહી ગયું હતું, જેના કારણે સર્ચ ઓપરેશનમાં ભારે મુશ્કેલીઓ પડી હતી. બચી ગયેલા મુસાફરોએ ભયાનક ક્ષણોને યાદ કરતા જણાવ્યું હતું કે આગ લાગ્યા બાદ ચારેય તરફ ગાઢ કાળો ધુમાડો છવાઈ ગયો હતો અને મુસાફરોની ચીસાચીસથી વાતાવરણ ગુંજી ઉઠ્યું હતું. બચાવકર્તાઓએ જહાજના અંદરના ભાગમાંથી તથા પાણીમાં તરતા મૃતદેહોને બહાર કાઢવાનું ભગીરથ કાર્ય હાથ ધર્યું હતું.
સત્તાવાર નિવેદનો અને મેનિફેસ્ટની ચકાસણી મુજબ, મનીલાના બેસેકો બંદરથી રવાના થયેલી આ ફેરી બુધવારે સાંજે ૬:૪૫ વાગ્યે કોરોનના માર્સિલા ગામ નજીક પહોંચી ત્યારે આ દુર્ઘટના ઘટી હતી. પ્રવાસીઓમાં લોકપ્રિય એવા ચૂનાના પથ્થરોના ખડકો અને સ્વચ્છ પાણી માટે જાણીતા આ ડાઇવિંગ સ્થળે પહોંચતા પહેલા જ ખુશીનો માહોલ માતમમાં ફેરવાઈ ગયો હતો. પેસેન્જર મેનિફેસ્ટની તપાસમાં એ પણ સામે આવ્યું છે કે યાદીમાં નોંધાયેલા બે વ્યક્તિઓ ખરેખર જહાજમાં ચડ્યા જ ન હતા, જ્યારે હાલ સત્તાવાળો દ્વારા આગ લાગવાના ચોક્કસ કારણો જાણવા માટે સઘન તપાસ ચાલી રહી છે.
ભૂતકાળની દરિયાઈ દુર્ઘટનાઓની કડીઓ પર નજર કરીએ તો ૭,૦૦૦થી વધુ ટાપુઓનો બનેલો દ્વીપસમૂહ હોવાને કારણે ફિલિપાઇન્સમાં દરિયાઈ અકસ્માતો અને ફેરી ડૂબી જવાની ઘટનાઓ અવારનવાર બનતી રહે છે, જેમાં આ વર્ષની શરૂઆતમાં જાન્યુઆરીમાં પણ દેશના દક્ષિણ ભાગમાં ફેરી ડૂબવાથી ૬૫ લોકોએ જીવ ગુમાવ્યા હતા. હાલની સ્થિતિમાં રાહત અને બચાવ કામગીરી પૂરજોશમાં ચાલી રહી છે, અને આગામી દિવસોમાં આ મામલે કસૂરવારો સામે કડક કાનૂની પગલાં લેવામાં આવશે તેમજ પીડિતોના પરિવારોને સહાય પૂરી પાડવા અંગે સરકારી સ્તરે વિચારણા થઈ રહી છે.