બેંગલુરુ : આકાશમાં ઉડાન દરમિયાન વધુ એક મોટી હોનારત ટળવાના સમાચારો સામે આવ્યા છે. આંધ્રપ્રદેશના ભોગાપુરમથી બેંગલુરુ આવી રહેલી એર ઈન્ડિયા એક્સપ્રેસની ફ્લાઈટ સાથે હવામાં પક્ષી અથડાવાની (બર્ડ સ્ટ્રાઈક) ગંભીર ઘટના બની હતી. જો કે, પાયલોટની સમયસૂચકતા અને સતર્કતાને કારણે વિમાનને બેંગલુરુના કેમ્પેગૌડા આંતરરાષ્ટ્રીય એરપોર્ટ પર સુરક્ષિત રીતે ઉતારી લેવામાં આવ્યું હતું, જેનાથી વિમાનમાં સવાર તમામ ૧૪૮ મુસાફરોએ રાહતનો શ્વાસ લીધો હતો.

સત્તાવાર સૂત્રો દ્વારા મળતી માહિતી મુજબ, આ અકસ્માત સોમવારે ઉડાન દરમિયાન સર્જાયો હતો. પક્ષી સાથેની અથડામણ હોવા છતાં અનુભવી વિમાની ચાલકોએ પરિસ્થિતિ પર તાત્કાલિક નિયંત્રણ મેળવી લીધું હતું અને વિમાનનું સેફ લેન્ડિંગ કરાવ્યું હતું. આ ઘટનામાં ફ્લાઈટમાં સવાર ૧૪૮ મુસાફરો તેમજ ક્રૂ મેમ્બર્સમાંથી કોઈને પણ નાના-મોટી ઈજા પહોંચી નથી અને તમામ લોકો સંપૂર્ણપણે સુરક્ષિત છે.

એરપોર્ટ પર લેન્ડિંગ બાદ નીતિ-નિયમો અને સત્તાવાર સુરક્ષા પ્રોટોકોલના ભાગરૂપે એન્જિનિયરિંગ અને ટેક્નિકલ ટીમો દ્વારા વિમાનના બોડી પાર્ટ્સ તથા એન્જિનની ઝીણવટભરી તપાસ કરવામાં આવી હતી. તપાસ દરમિયાન એન્જિન કે વિમાનના માળખાને કોઈ મોટું નુકસાન ન થયું હોવાનું માલૂમ પડ્યું હતું.

એર ઈન્ડિયા એક્સપ્રેસના પ્રવક્તાએ આ અંગે નિવેદન જારી કરીને સ્પષ્ટતા કરી છે કે, વિમાનની સંપૂર્ણ ટેક્નિકલ ચકાસણી પૂર્ણ કરી લેવામાં આવી છે અને તેને ફરીથી સુચારૂ ઉડાન માટે યોગ્ય (સર્વિસેબલ) જાહેર કરવામાં આવ્યું છે. આ ઘટનાને કારણે એરલાઈનની અન્ય ફ્લાઈટ્સ અને દૈનિક કામગીરી પર કોઈ વિપરીત અસર પડી નથી અને સેવાઓ સામાન્ય રીતે ચાલુ છે.