હૈદરાબાદ | તા. 26: દક્ષિણ ભારતના સૌથી વ્યસ્ત અને અત્યાધુનિક ગણાતા હૈદરાબાદના રાજીવ ગાંધી આંતરરાષ્ટ્રીય એરપોર્ટ પરથી એક ચોંકાવનારો વીડિયો સામે આવ્યો છે, જેણે એરપોર્ટની સુરક્ષા વ્યવસ્થા પર ગંભીર સવાલો ઉભા કર્યા છે. આંતરરાષ્ટ્રીય સ્તરની સુવિધાઓ ધરાવતા એરપોર્ટના પેસેન્જર લાઉન્જમાં એક રખડતો કૂતરો ઘૂસી આવ્યો હતો અને મુસાફરો માટે રાખવામાં આવેલા ટેબલ પરનું બચેલું ભોજન આરોગતો નજરે પડ્યો હતો.
સુરક્ષા વ્યવસ્થા પર સવાલોના ઘેરામાં એરપોર્ટ
એરપોર્ટ જેવી અત્યંત સંવેદનશીલ અને હાઇ-સિક્યુરિટી ધરાવતી જગ્યાએ પ્રાણીઓનું પ્રવેશવું એ એરપોર્ટ ઓથોરિટીની બેદરકારી દર્શાવે છે. સોશિયલ મીડિયા પર આ ઘટનાનો વીડિયો વાયરલ થતા જ મુસાફરોમાં રોષ જોવા મળ્યો હતો. લોકોએ સવાલ ઉઠાવ્યો છે કે જ્યારે મુસાફરો માટે કડક તપાસ પ્રક્રિયા હોય છે, ત્યારે રખડતા પ્રાણીઓ સુરક્ષાની તમામ દીવાલો તોડીને અંદર કેવી રીતે પહોંચ્યા?
તંત્રનો બચાવ: શું કહે છે એરપોર્ટ અધિકારીઓ?
ઘટના બાદ રાજીવ ગાંધી આંતરરાષ્ટ્રીય એરપોર્ટના અધિકારીઓએ સ્પષ્ટતા કરતા જણાવ્યું હતું કે, તેઓ આ મામલે ગંભીર છે. અધિકારીઓના જણાવ્યા મુજબ, "અમે રખડતા કૂતરાઓને નિયંત્રિત કરવા માટે ગ્રેટર હૈદરાબાદ મ્યુનિસિપલ કોર્પોરેશન (GHMC) સાથે સતત સંપર્કમાં છીએ. જાન્યુઆરી 2026 થી અત્યાર સુધીમાં એરપોર્ટ પરિસરમાંથી ૨૧ જેટલા કૂતરાઓને હટાવવાની કામગીરી કરવામાં આવી છે." વધુમાં, એરપોર્ટ પર કચરા વ્યવસ્થાપન માટે ઢંકાયેલા ડબ્બાઓ રાખવા અને સ્ટાફને વધુ સતર્ક રહેવા માટે કડક સૂચના આપવામાં આવી છે.
સુપ્રીમ કોર્ટના કડક વલણ વચ્ચે ઘટના
આ ઘટના એવા સમયે બની છે જ્યારે સુપ્રીમ કોર્ટે જાહેર સ્થળોએ રખડતા કૂતરાઓના ત્રાસને લઈને ચિંતા વ્યક્ત કરી છે. કોર્ટે સ્પષ્ટ કર્યું છે કે શાળાઓ, હોસ્પિટલો અને એરપોર્ટ જેવા સંવેદનશીલ જાહેર વિસ્તારોમાં રખડતા કૂતરાઓને દૂર કરવા જરૂરી છે. કોર્ટે નોંધ્યું છે કે, "કૂતરાના કરડવાનો ભય અને જોખમ હવે માત્ર ગલીઓમાં જ નહીં, પરંતુ એરપોર્ટ અને રહેણાંક વિસ્તારો જેવા મહત્વપૂર્ણ જાહેર સ્થળો સુધી પહોંચી ગયું છે."
આ ઘટનાએ ફરી એકવાર સાબિત કરી દીધું છે કે વહીવટીતંત્રના કાગળ પરના દાવાઓ અને ગ્રાઉન્ડ રિયાલિટી વચ્ચે મોટું અંતર છે. જ્યારે મુસાફરો લાખો રૂપિયાની ટિકિટ ખરીદીને એરપોર્ટ પર સુરક્ષિત સુવિધાની અપેક્ષા રાખે છે, ત્યારે આવી ઘટનાઓ એરપોર્ટની પ્રતિષ્ઠાને મોટું નુકસાન પહોંચાડે છે.