નવી દિલ્હી : પાટનગર દિલ્હીમાં પ્રસ્તાવિત વિરોધ પ્રદર્શનને પગલે સર્જાયેલી સુરક્ષાત્મક સ્થિતિમાં હવે મોટો સુધારો જોવા મળી રહ્યો છે. દિલ્હી પોલીસે અટકાયત કેન્દ્રોમાં રખાયેલા તમામ ૪,૦૦૦ વિરોધકર્તાઓને મુક્ત કરી દીધા છે, જેનાથી રાજધાનીમાં સ્થિતિ ઝડપથી સામાન્ય થઈ રહી છે. જોકે, કાયદો અને વ્યવસ્થા જાળવી રાખવાના ભાગરૂપે CJPના મુખ્ય નેતાઓને હજુ મુક્ત કરવામાં આવ્યા નથી. પોલીસ સૂત્રોના જણાવ્યા મુજબ, નેતાઓ સામે કાનૂની કાર્યવાહી યથાવત રાખવામાં આવશે અને નિયમોનુસાર આગળનાં પગલાં લેવાશે.

પોલીસ કસ્ટડીમાં રહેલા મુખ્ય ચહેરાઓમાં અભિજીત દિપકે, આશુતોષ રંકા, સૌરભ દાસ અને ધ્રુવ રાઠીનો સમાવેશ થાય છે. આ અટકાયત દરમિયાન અભિજીત દિપકેના દાદીનું અવસાન થતાં દિલ્હી પોલીસે માનવતાવાદી ધોરણે તેમને મુક્ત કરીને મહારાષ્ટ્ર જવાની મંજૂરી આપી હતી, પરંતુ તેમણે સ્વેચ્છાએ જવાનો સ્પષ્ટ ઇનકાર કરી દીધો હતો. બીજી તરફ, પ્રદર્શન દરમિયાન વિવિધ સ્થળોએથી પકડાયેલા તમામ સામાન્ય સમર્થકોને હવે સંપૂર્ણપણે મુક્ત કરી દેવામાં આવ્યા છે, જેથી વિરોધનો મુખ્ય ઉકાળો શમતો દેખાઈ રહ્યો છે.

જાહેર પરિવહન અને સામાન્ય જનજીવનને પાટા પર લાવવા માટે પણ મોટા નિર્ણયો લેવાયા છે. કાયદો-વ્યવસ્થાની સ્થિતિને ધ્યાનમાં રાખીને અગાઉ બંધ કરાયેલા દિલ્હી મેટ્રોના ૪૫ સ્ટેશનોના તમામ એન્ટ્રી અને એક્ઝિટ ગેટ હવે મુસાફરો માટે સંપૂર્ણપણે ખોલી દેવામાં આવ્યા છે. આ સાથે જ તમામ સંબંધિત સ્ટેશનો પર ઇન્ટરચેન્જ સુવિધાઓ પણ પુનઃસ્થાપિત કરી દેવાઈ છે, જેનાથી સામાન્ય મુસાફરોને એક લાઇનમાંથી બીજી લાઇનમાં ટ્રેન બદલવામાં અને પોતાના ગંતવ્ય સ્થાન સુધી પહોંચવામાં મોટી રાહત મળી છે.

આ ઉપરાંત, સુરક્ષા વ્યવસ્થાના ભાગરૂપે એક્સાઇઝ વિભાગ દ્વારા ૯ અને ૧૦ ઓક્ટોબરના રોજ રાજધાનીમાં બંધ રાખવામાં આવેલી તમામ સરકારી અને ખાનગી દારૂની છૂટક દુકાનો રવિવાર, ૧૧ ઓક્ટોબરથી ફરીથી ધમધમતી થશે. અગાઉ દિલ્હી પોલીસના ઇનપુટ્સના આધારે જ કાયદો અને વ્યવસ્થા જાળવવા આ દુકાનો બંધ રખાઈ હતી, જોકે તે સમયે પણ લાયસન્સ ધરાવતા બાર, રેસ્ટોરન્ટ અને ક્લબ ચાલુ જ રહ્યા હતા. હવે શનિવાર સુધીનો આદેશ પૂર્ણ થતાં જનજીવન અને વેપાર-રોજગાર પૂર્વવત થઈ રહ્યા છે.