મુંબઈ : મહારાષ્ટ્રની આર્થિક રાજધાની મુંબઈ અને રાજ્યભરમાં ઓલા, ઉબેર તેમજ રેપિડો જેવી એપ આધારિત કેબ અને બાઈક ટેક્સી સેવાઓનો ઉપયોગ કરતા લાખો મુસાફરોની સુરક્ષા સામે ગંભીર સવાલો ઊભા થયા છે. તાજેતરમાં મુંબઈના માહિમ વિસ્તારમાં રેપિડો બાઈક ચલાવતા એક વ્યક્તિ સામે આતંકવાદ વિરોધી દળ (ATS) દ્વારા શંકાસ્પદ ગતિવિધિઓ બદલ મોટી કાર્યવાહી કરવામાં આવ્યા બાદ રાજ્ય સરકારે ડ્રાઇવરોની પૃષ્ઠભૂમિ (બેકગ્રાઉન્ડ) ની ચકાસણી બાબતે લાલબત્તી ધરી દીધી છે.

પ્રાપ્ત વિગતો અનુસાર, આ ગંભીર ઘટનાની ગંભીરતાને ધ્યાનમાં રાખીને પરિવહન પ્રધાન પ્રતાપ સરનાઈકે મોટર પરિવહન વિભાગના ઉચ્ચ અધિકારીઓ સાથે એક બેઠક યોજી હતી. આ બેઠકમાં તમામ એપ આધારિત પરિવહન સેવાઓ સાથે સંકળાયેલા ડ્રાઇવરોની ઓળખ, ડ્રાઇવિંગ લાઇસન્સ, અને પોલીસ વેરિફિકેશન સઘન રીતે કરવાના આદેશ આપવામાં આવ્યા છે, જેથી કોઈપણ અસામાજિક તત્વ મુસાફરોના જીવન સાથે ચેડાં ન કરી શકે.

ઘટનાની વિગતો આપતા અધિકારીઓએ જણાવ્યું હતું કે માહિમ વિસ્તારમાં ઝડપાયેલા ડ્રાઇવર સામે સોશિયલ મીડિયા પર વાંધાજનક સામગ્રી ફેલાવવાનો આરોપ છે, જોકે પ્રાથમિક તપાસમાં તેના પાકિસ્તાની સંગઠનો સાથે સીધા સંબંધ હોવાના પુરાવા મળ્યા નથી. છતાં મુસાફરોની સુરક્ષા સર્વોપરી હોવાથી સરકારે ભવિષ્યમાં આવી કોઈપણ ઘટના ન બને તે માટે આગોતરા પગલાં રૂપે ડ્રાઇવરોની ભરતી પ્રક્રિયાની ચકાસણી કરવાનું નક્કી કર્યું છે.

પરિવહન પ્રધાન પ્રતાપ સરનાઈકે સ્પષ્ટ નિર્દેશ આપ્યો છે કે હવે પછી કોઈપણ ઘટના બની ગયા બાદ પ્રતિક્રિયા આપવાને બદલે અગાઉથી જ તમામ પ્લેટફોર્મ પર નિયમિત દેખરેખ રાખવામાં આવશે. કંપનીઓ દ્વારા ડ્રાઇવરોને નોકરી પર રાખતી વખતે તેમના દસ્તાવેજોની યોગ્ય તપાસ થાય છે કે કેમ તેની પણ સમીક્ષા કરવામાં આવશે અને નિયમોનું ઉલ્લંઘન કરનાર સામે કાયદાકીય ફોજદારી કેસ નોંધવામાં આવશે.

આ બેઠકમાં પરિવહન વિભાગ દ્વારા એ વાતની પણ સમીક્ષા કરવામાં આવી રહી છે કે વર્તમાન કાયદાકીય જોગવાઈઓ આ પ્રકારની એપ આધારિત સેવાઓ પર અંકુશ રાખવા માટે પૂરતી છે કે નહીં. જો કાયદામાં છટકબારીઓ જણાશે તો રાજ્ય પરિવહન સત્તામંડળના નિયમોને વધુ મજબૂત કરવા માટે નવા અથવા સુધારેલા કાયદા ઘડવાની દિશામાં પણ વિચારણા કરવામાં આવી રહી છે.

સરકારના આ કડક નિર્ણયથી ઓલા, ઉબેર અને રેપિડો જેવી કંપનીઓની કામગીરી પર સીધી અસર પડશે અને તેમણે ડ્રાઇવરોની નોંધણી તથા સુરક્ષા માપદંડોનું કડક પાલન કરવું પડશે. આગામી દિવસોમાં આ નિયમોનો અમલ કઈ રીતે થાય છે અને પ્રવાસીઓની સુરક્ષા કેટલી મજબૂત બને છે તે જોવું રહ્યું.