વોશિંગ્ટન : ઈરાન સામે ચાલી રહેલી કડક નૌકાદળ નાકાબંધી વચ્ચે અમેરિકાએ ઓમાનના અખાતમાં એક મોટા કાર્ગો જહાજ પર ફાઇટર જેટ વડે લક્ષિત હુમલો કર્યો છે. યુએસ સેન્ટ્રલ કમાન્ડ (CENTCOM) ના જણાવ્યા અનુસાર, પનામાના ધ્વજવાળા જહાજ 'M/V ઓશન મોલિકા' (જે 'એરિકા સન' તરીકે પણ ઓળખાય છે) એ દરિયાઈ ચેતવણીઓ અને સૂચનાઓને અવગણીને નાકાબંધી તોડવાનો પ્રયાસ કર્યો હતો. આ હુમલામાં જહાજના પાછળના ભાગે (સ્ટર્ન) નિશાન સાધી તેની પ્રોપલ્શન સિસ્ટમને સંપૂર્ણપણે નિષ્ક્રિય કરી દેવામાં આવી હતી, જોકે સદ્ભાગ્યે ક્રૂ સભ્યોને કોઈ ઈજા થઈ નથી.

સેન્ટકોમે સોશિયલ મીડિયા પ્લેટફોર્મ X પર સ્પષ્ટતા કરી હતી કે આ બલ્ક કેરિયર ઈરાની બંદરથી રવાના થઈને પ્રાદેશિક જળમાર્ગ પાર કરવાનો પ્રયાસ કરી રહ્યું હતું. અમેરિકાએ ઈરાની બંદરો તરફ જતાં અને ત્યાંથી આવતાં તમામ વાણિજ્યિક શિપિંગ ટ્રાફિક પર કડક સૈન્ય નાકાબંધી લાદેલી છે. નિયમો મુજબ, જે જહાજો યુએસ સેનાના નિર્દેશોનું પાલન કરે છે તેમને અન્ય માર્ગે ડાયવર્ટ કરાય છે, પરંતુ આદેશોનો અનાદર કરનાર જહાજો સામે આ પ્રકારે તેને સ્થગિત કરવા માટે સૈન્ય કાર્યવાહી હાથ ધરવામાં આવે છે.

અમેરિકી સૈન્ય દ્વારા જારી કરાયેલા તાજેતરના આંકડા મુજબ, નાકાબંધીના છેલ્લા ત્રણ મહિના દરમિયાન ચાર વાણિજ્યિક જહાજોને નિષ્ક્રિય કરાયા છે અને 135 જહાજોને પાછા મોકલવામાં આવ્યા છે. આ ઉપરાંત, યુએસ સેનાએ IRGC ના કથિત ગુપ્ત દરિયાઈ પરિવહન નેટવર્ક સાથે જોડાયેલા 10 તેલ ટેન્કરોનો પણ નાશ કર્યો હોવાનો દાવો કર્યો છે. ઓમાનનો અખાત અને હોર્મુઝ સ્ટ્રેટ આંતરરાષ્ટ્રીય ઉર્જા પુરવઠા માટે અત્યંત સંવેદનશીલ અને મહત્વપૂર્ણ માર્ગ હોવાથી આ કાર્યવાહીથી દરિયાઈ વેપાર પર મોટો પ્રભાવ પડ્યો છે.

સ્થિતિની ગંભીરતાને ધ્યાનમાં રાખીને યુએસ સેન્ટ્રલ કમાન્ડે તમામ નાવિકો અને શિપિંગ કંપનીઓને "નોટિસ ટુ મરીનર્સ" પ્રસારણ પર સતત નજર રાખવા અને ચેનલ 16 પર યુએસ નૌકાદળ સાથે રેડિયો સંચાર જાળવી રાખવા સૂચના આપી છે. ઈરાન આસપાસ વધી રહેલા આ લશ્કરી તણાવ અને નાકાબંધીના કારણે આગામી દિવસોમાં વૈશ્વિક ઉર્જા પુરવઠો અને આંતરરાષ્ટ્રીય શિપિંગ ભાડાં પર ભારે દબાણ સર્જાવાની શક્યતા છે, જેના પર વૈશ્વિક સમુદાયની નજર ટકેલી છે.