પટના, તા.૨૮: દેશમાં ચૂંટણી પ્રક્રિયાની પારદર્શિતા અને ભારતીય ચૂંટણી પંચ (ECI)ની નિષ્પક્ષતાને લઈને ફરી એકવાર રાજકીય સંગ્રામ છેડાયો છે. 'જન સુરાજ પાર્ટી'ના સ્થાપક અને જાણીતા રાજકીય વ્યૂહરચનાકાર પ્રશાંત કિશોરે ચૂંટણી પંચની કામગીરી પર ગંભીર સવાલો ઉઠાવતા તેમાં 'વ્યાપક અને મૂળભૂત સુધારા' કરવાની જોરદાર માંગ કરી છે. તેમણે ખુલ્લેઆમ આક્ષેપ કર્યો છે કે વર્તમાન ચૂંટણી પ્રક્રિયાના વિવિધ મહત્વપૂર્ણ પાસાઓમાં સત્તાધારી ભારતીય જનતા પાર્ટી (BJP) તેમજ નેશનલ ડેમોક્રેટિક એલાયન્સ (NDA)નો સ્પષ્ટ પ્રભાવ જોવા મળી રહ્યો છે, જે લોકશાહી માટે ચિંતાજનક છે.

પ્રશાંત કિશોરના આ આકરા પ્રહારો એવા સમયે સામે આવ્યા છે જ્યારે ચૂંટણી પંચની અંદર જ અધિકારીઓ વચ્ચે મતભેદો હોવાના અહેવાલો સામે આવ્યા બાદ દેશભરમાં રાજકીય ગરમાવો આવી ગયો છે. ચૂંટણી પ્રક્રિયા, મતદાર યાદીની પારદર્શિતા અને વિવિધ નિર્ણયોમાં સત્તાપક્ષને મળતા ફાયદા અંગે વિપક્ષો અને રાજકીય વિશ્લેષકો દ્વારા સતત સવાલો ઊભા કરવામાં આવી રહ્યા છે.

બીજી તરફ, ઉઠેલા આ તમામ વિવાદો અને આક્ષેપો સામે ચૂંટણી પંચે પોતાની સ્પષ્ટતા રજૂ કરી છે. ECI એ જણાવ્યું છે કે કોઈ પણ બંધારણીય સંસ્થામાં ભિન્ન-ભિન્ન મંતવ્યો હોવા એ સ્વાભાવિક છે અને તે સંસ્થાકીય વિચાર-વિમર્શનો જ એક ભાગ છે. પંચે દાવો કર્યો હતો કે તમામ આંતરિક મંથન બાદ આખરી નિર્ણયો હંમેશા સર્વસંમતિથી જ લેવામાં આવે છે. જોકે, ચૂંટણી પંચમાં 'SIR' અને મતદાર યાદીની પારદર્શિતા અંગે ઊભા થયેલા સવાલો વચ્ચે પ્રશાંત કિશોરના આ નિવેદને રાજકીય વર્તુળોમાં મોટી ચર્ચા જગાવી છે.