કમ્માલાવંડલા પલ્લી,: આંધ્રપ્રદેશના શ્રી સત્યસાઈ જિલ્લાના એક નાનકડા ગામમાં બુધવારે એક એવી દુર્ઘટના સર્જાઈ જેણે સૌના કાળજા કંપાવી દીધા છે. એક સામાન્ય ગેસ લીકેજની ઘટનાએ ઘરમાં ગેરકાયદેસર રીતે રાખવામાં આવેલા વિસ્ફોટકોને કારણે ભયાનક સ્વરૂપ ધારણ કર્યું હતું. આ પ્રચંડ વિસ્ફોટમાં ૪ લોકોએ પોતાના જીવ ગુમાવ્યા છે, જ્યારે ૨૯ થી વધુ લોકો લોહીલુહાણ હાલતમાં હોસ્પિટલમાં સારવાર લઈ રહ્યા છે.
કેવી રીતે સર્જાયો કાળમુખો વિસ્ફોટ?
પોલીસના જણાવ્યા અનુસાર, વેંકન્ના (૫૫) નામનો વ્યક્તિ પોતાના બે રૂમના ઘરમાં સવારે ચા બનાવી રહ્યો હતો. આ દરમિયાન ગેસ સ્ટવ અને સિલિન્ડરને જોડતી નળી અચાનક નીકળી ગઈ અને ગેસ લીક થવા લાગ્યો. વેંકન્નાએ તેને રોકવાનો પ્રયાસ કર્યો પણ આગ લાગી ગઈ. ગેસ સિલિન્ડર ફાટવાના ડરથી વેંકન્ના તેના પરિવારના ૭ સભ્યો સાથે ઘર છોડીને ભાગી ગયો, પરંતુ તેણે ગામના લોકોને ચેતવ્યા નહીં કે તેના ઘરમાં મોતનો સામાન છુપાયેલો છે.
૧૫૦ જિલેટીન સ્ટિક્સ બની ‘ટાઈમ બોમ્બ’
આગ બુઝાવવા માટે પાડોશીઓ અને આશરે ૫૦ જેટલા લોકો ઘર પાસે દોડી આવ્યા હતા. બરાબર ત્યારે જ ઘરમાં ગુલાબી બોક્સમાં છુપાવેલી ૧૫૦ જિલેટીન સ્ટિક્સ અતિશય ગરમી અને દબાણને કારણે એક પછી એક ફૂટવા લાગી. વિસ્ફોટ એટલો શક્તિશાળી હતો કે બે ઘર પત્તાના મહેલની જેમ તૂટી પડ્યા અને આસપાસના અન્ય ચાર ઘરોને ભારે નુકસાન થયું. આ અંધાધૂંધીમાં નિર્દોષ પાડોશીઓ અને દર્શકો વિસ્ફોટનો ભોગ બન્યા.
રૂપિયા બચાવવાની જીવલેણ લાલચ
તપાસમાં બહાર આવ્યું છે કે વેંકન્ના વ્યવસાયે પથ્થર તોડવાનું કામ કરે છે. તે છેલ્લા ૮-૯ મહિનાથી કામના સ્થળેથી ૧૦-૧૫ જિલેટીન સ્ટિક્સ ચોરી કરીને ઘરે ભેગી કરતો હતો. એસપી એસ. સતીશે જણાવ્યું કે, આ ૧૫૦ સ્ટિક્સની કિંમત માંડ ૨,૮૦૦ રૂપિયા જેવી થાય છે. માત્ર આટલા પૈસા બચાવવા માટે તેણે આટલો મોટો વિસ્ફોટક જથ્થો રહેણાંક વિસ્તારમાં રાખ્યો હતો. અભણ હોવાને કારણે તેને અંદાજ નહોતો કે આગ અને ગરમીથી પણ આ સ્ટિક્સ ફૂટી શકે છે.
પોલીસ કાર્યવાહી
પોલીસને ઘટનાસ્થળેથી બે ક્ષતિગ્રસ્ત ગેસ સિલિન્ડર પણ મળી આવ્યા છે. હાલમાં પોલીસ દ્વારા વેંકન્ના વિરુદ્ધ ભારતીય ન્યાય સંહિતા (BNS) અને વિસ્ફોટક પદાર્થોના કાયદા હેઠળ ગુનો નોંધી વધુ તપાસ હાથ ધરવામાં આવી છે. આ ઘટનાએ રહેણાંક વિસ્તારોમાં ગેરકાયદેસર વિસ્ફોટકોના સંગ્રહ સામે ગંભીર સવાલો ઉભા કર્યા છે.
તપાસનો વિષય: લાયસન્સ ધરાવતા કોન્ટ્રાક્ટરો પાસેથી આ વિસ્ફોટકો મજૂરો સુધી કેવી રીતે પહોંચ્યા અને સુરક્ષાના નિયમોનું ઉલ્લંઘન કેવી રીતે થયું તે અંગે પોલીસ તપાસ કરી રહી છે.