નવી દિલ્હી : સોશિયલ મીડિયા પર ભારતની છબી ખરાબ કરવાના હેતુથી છેલ્લા કેટલાક અઠવાડિયાથી લગભગ ૧૫૦ જેટલા ચીની પ્રભાવકો બાંગ્લાદેશની રાજધાની ઢાકાના ઉત્તરા અને ટેકપારા જેવા પછાત ઝૂંપડપટ્ટી વિસ્તારોમાં છાવણી નાખીને ત્યાંના દ્રશ્યોને 'નવી દિલ્હી' તરીકે લાઈવસ્ટ્રીમિંગ કરી રહ્યા હોવાની ચોંકાવનારી ઘટના સામે આવી છે.

પ્રાપ્ત વિગતો અનુસાર, ચીની સોશિયલ મીડિયા પ્લેટફોર્મ વીચેટ અને ટિકટોક પર ભારત વિરુદ્ધ જાતિવાદી ટિપ્પણીઓ અને નફરત ફેલાવવા માટે આ પ્રભાવકો બાંગ્લાદેશી નાગરિકોની ગરીબી અને અસ્વચ્છ વાતાવરણને ભારતીય પ્રદેશ તરીકે દર્શાવીને દુનિયાભરમાં ભ્રામક મીમ્સ અને વીડિયો વાયરલ કરી રહ્યા છે.

સ્થાનિક અહેવાલો મુજબ, આ ચીની નાગરિકો છેલ્લા ત્રણ અઠવાડિયાથી કોઈ પણ સત્તાવાર મંજૂરી કે વહીવટી જાણકારી વગર ગીચ વસ્તીવાળા વિસ્તારોમાં જઈને ચાના સ્ટોલ અને ગંદી નહેરોની આસપાસના ખોટા વર્ણનો આપી રહ્યા છે, જેમાં ગૌમૂત્રમાંથી ચા બનતી હોવા જેવા વાહિયાત અને અપમાનજનક દાવાઓ પણ કરવામાં આવ્યા છે.

આ ગંભીર પ્રથા અંગે જ્યારે સ્થાનિક લોકો અને મીડિયા દ્વારા તપાસ કરવામાં આવી અને ચીની ભાષાના પ્રસારણોનો અનુવાદ કરાયો ત્યારે સ્પષ્ટ થયું કે તેઓ જાણી જોઈને બાંગ્લાદેશી વાસ્તવિકતાને ભારતની ગણાવીને આંતરરાષ્ટ્રીય સ્તરે દેશની પ્રતિષ્ઠાને નુકસાન પહોંચાડી રહ્યા છે.

અગાઉ પણ સિંગાપોર સહિતના દેશો દ્વારા ચીની સોશિયલ મીડિયા એપ્સ પર પ્રસરતી ભારત વિરોધી સામગ્રી સામે ચિંતા વ્યક્ત કરીને પ્રતિબંધો મૂકવામાં આવ્યા હતા, ત્યારે બાંગ્લાદેશના સ્થાનિક તંત્ર દ્વારા આ ગેરકાયદેસર પ્રવૃત્તિઓ અંગે સઘન તપાસ શરૂ કરવામાં આવી છે.

આ ઘટના બાદ ભારતીય વિદેશ મંત્રાલય અને સુરક્ષા એજન્સીઓ પણ સાયબર સ્તરે ફેલાવવામાં આવતા આવા આંતરરાષ્ટ્રીય પ્રોપાગન્ડા અને દુષ્પ્રચાર સામે કડક નજર રાખી રહી છે જેથી ભારત વિરોધી માનસિકતાનો યોગ્ય જવાબ આપી શકાય.