માલે, તા.27: દક્ષિણ એશિયાઈ રાજકારણ અને હિંદ મહાસાગરમાં બદલાતા કૂટનીતિક સમીકરણો વચ્ચે માલદીવના રાષ્ટ્રપતિ મોહમ્મદ મુઇઝ્ઝુની તાજેતરની પાકિસ્તાનની સત્તાવાર મુલાકાતે આંતરરાષ્ટ્રીય વર્તુળોમાં ભારે ચર્ચા જગાવી છે. છેલ્લા અગિયાર વર્ષમાં માલદીવના કોઈ રાષ્ટ્રપતિ દ્વારા પાકિસ્તાનની આ પ્રથમ યાત્રા છે, જે દરમિયાન બંને દેશો વચ્ચે આરોગ્ય, શિક્ષણ, વેપાર, સાયબર સુરક્ષા અને મેરીટાઇમ સિક્યુરિટી જેવા મહત્વપૂર્ણ ક્ષેત્રોમાં ૨૦ જેટલા સમજૂતી કરારો (MoU) પર હસ્તાક્ષર કરવામાં આવ્યા છે.

આ ઘટનાક્રમ સામે આવતા જ માલદીવના આંતરિક રાજકારણમાં મોટો રાજકીય ભૂકંપ સર્જાયો છે અને વિપક્ષી નેતાઓ દ્વારા સરકારની આ અસંતુલિત વિદેશ નીતિ સામે તીવ્ર પ્રહારો કરવામાં આવી રહ્યા છે. ખાસ કરીને ભારત જેવા પરંપરાગત, વિશ્વસનીય અને સૌથી નજીકના પડોશી દેશ સાથેના ઐતિહાસિક સંબંધોને જોખમમાં મૂકવા બદલ મુઇઝ્ઝુ સરકારના આ પગલાને ભારે બેદરકારીભર્યું ગણાવવામાં આવી રહ્યું છે.

માલદીવિયન ડેમોક્રેટિક પાર્ટી (MDP) ના અધ્યક્ષ અને પૂર્વ રાષ્ટ્રપતિ મોહમ્મદ નશીદે આ નિર્ણયની આકરી ટીકા કરતા જણાવ્યું છે કે આ મુલાકાત કોઈપણ પ્રકારના ગહન વિચાર-વિમર્શ વિના લેવાયેલો ઉતાવળિયો નિર્ણય છે. તેમણે સ્પષ્ટ ચેતવણી આપતા કહ્યું હતું કે જો ભારતને લાગશે કે તેની રાષ્ટ્રીય સુરક્ષા સાથે કોઈ સમજૂતી થઈ રહી છે, તો તેના માલદીવ માટે અત્યંત ગંભીર અને માઠા પરિણામો આવી શકે છે.

વિપક્ષના અન્ય દિગ્ગજ નેતાઓ અને પૂર્વ વિદેશ મંત્રી અબ્દુલ્લા શાહિદે પણ આશંકા વ્યક્ત કરી છે કે મુઇઝ્ઝુ સરકાર ફરી એકવાર ભારત-વિરોધી અભિયાનને પ્રોત્સાહન આપી રહી છે. આ ઉપરાંત, પાકિસ્તાન દ્વારા રાષ્ટ્રપતિ મુઇઝ્ઝુને આપવામાં આવેલી માનદ ડૉક્ટરેટની પદવી અંગે પણ પૂર્વ રાષ્ટ્રપતિ અબ્દુલ્લા યામીન સહિતના અનેક નેતાઓએ ગંભીર સવાલો ઉઠાવ્યા છે.

સત્તાવાર સ્તરે આ મુલાકાતને બંને દેશો વચ્ચેના રાજદ્વારી સંબંધોની ૬૦મી વર્ષગાંઠની ઉજવણી તરીકે દર્શાવવામાં આવી રહી છે, પરંતુ આંતરરાષ્ટ્રીય નિષ્ણાતોના મતે હિંદ મહાસાગર ક્ષેત્રમાં વ્યૂહાત્મક પ્રભુત્વ માટે ચાલી રહેલા તણાવ વચ્ચે આ ઘટનાક્રમ ક્ષેત્રીય સંતુલનને મોટો ફટકો પહોંચાડી શકે છે.

આગામી સમયમાં માલદીવની રાજનીતિમાં આ મુદ્દો વધુ ઉગ્ર બનવાની શક્યતા છે. ભારતીય વિદેશ મંત્રાલય અને સુરક્ષા એજન્સીઓ પણ હિંદ મહાસાગર ક્ષેત્રની શાંતિ અને રાષ્ટ્રીય સુરક્ષાની દ્રષ્ટિએ આ સમગ્ર ઘટનાક્રમ અને પાકિસ્તાન-માલદીવ વચ્ચે થયેલા લશ્કરી તથા મેરીટાઇમ કરારો પર ઝીણવટભરી નજર રાખી રહી છે.