નવી દિલ્હી: દિલ્હી યુનિવર્સિટીની પ્રખ્યાત શ્રી રામ કોલેજ ઓફ કોમર્સના શતાબ્દી સમારોહમાં વડાપ્રધાન નરેન્દ્ર મોદી દ્વારા કરવામાં આવેલા ભાષણ બાદ દેશના રાજકારણમાં ગરમાવો આવી ગયો છે. પીએમ મોદીએ કરેલી "ક્રોધિત કાકા" અને વિપક્ષ પરના પરોક્ષ પ્રહારો વાળા નિવેદનો સામે કોંગ્રેસ પ્રમુખ મલ્લિકાર્જુન ખડગેએ આકરો પલટવાર કર્યો છે. ખડગેએ આરોપ લગાવ્યો છે કે વડાપ્રધાન યુવાનો અને દેશના વાસ્તવિક પ્રશ્નોના જવાબ આપવાને બદલે પોતાની નિષ્ફળતાઓ છુપાવવા વિપક્ષને દર વર્ષે નવા-નવા નામો આપી રહ્યા છે.

કોંગ્રેસ પ્રમુખે સોશિયલ મીડિયા પ્લેટફોર્મ X પર પોસ્ટ કરીને જણાવ્યું હતું કે, દિલ્હી યુનિવર્સિટી ખાતેનો કાર્યક્રમ દેશના યુવાનો સાથે શિક્ષણ અને તેમના ભવિષ્ય અંગે સાર્થક ચર્ચા કરવાનો એક મોટો અવસર હતો. પરંતુ કમનસીબે, યુવાનો અને વિદ્યાર્થીઓના મૂળભૂત પ્રશ્નોના જવાબો આપવાને બદલે આ મંચનો ઉપયોગ ફરી એકવાર રાજકીય પ્રચાર અને અભિયાન માટે કરવામાં આવ્યો હતો.

મલ્લિકાર્જુન ખડગેએ લોકશાહીના મૂલ્યો અંગે વાત કરતા કહ્યું કે, વિપક્ષ દ્વારા પૂછવામાં આવતા પ્રશ્નોને દબાવવા માટે સમય સમય પર અલગ-અલગ લેબલ લગાવવામાં આવે છે. "ક્રોધિત કાકા", "માનસિક નક્સલ", "અર્બન નક્સલ", "ખાન માર્કેટ ગેંગ", "આંદોલનજીવી" કે "પરજીવી" જેવા નામો જ બદલાય છે, પરંતુ મોદી સરકારની જનવિરોધી નીતિઓ એ જ રહે છે. તેમણે વડાપ્રધાનને સલાહ આપતા કહ્યું કે દેશના યુવાનો પોતાના રિપોર્ટ કાર્ડ સાથે તૈયાર છે, તેથી તેમણે અપ્રસ્તુત વાતો કરવાને બદલે વિદ્યાર્થીઓના અવાજ અને પડઘાને સાંભળવો જોઈએ.

આ વિવાદની શરૂઆત ત્યારે થઈ જ્યારે પીએમ મોદીએ SRCCના કાર્યક્રમમાં વિદ્યાર્થીઓને સંબોધતા કેમ્પસ બહારની દુનિયામાં બે પ્રકારના લોકો હોવાનું જણાવ્યું હતું. તેમણે કહ્યું હતું કે એક વર્ગ સમાજની તાકાતને દેશના વિકાસમાં સકારાત્મક રીતે બદલે છે, જ્યારે બીજો વર્ગ એવો છે જે કોઈપણ નવું કે સારું કામ શરૂ થાય ત્યારે "ક્રોધિત કાકા" બનીને તેનો વિરોધ કરવા લાગે છે.