બાજૌર, : પાકિસ્તાનના સૌથી અશાંત ગણાતા ખૈબર પખ્તુનખ્વા પ્રાંતના બાજૌર જિલ્લામાં શનિવારે એક શક્તિશાળી બોમ્બ વિસ્ફોટ થવાથી ૩ લોકોનાં મોત નીપજ્યાં છે અને ૭થી વધુ લોકો ગંભીર રીતે ઈજાગ્રસ્ત થયા છે, જેને લઈને સમગ્ર વિસ્તારમાં ભારે અફરાતફરી અને ફફડાટ વ્યાપી ગયો છે.

મળતી માહિતી મુજબ, બાજૌર જિલ્લાના સલાબજઈ તાલુકા હેઠળના તાલી બાંધ પાસે થયેલા આ ઘાતક બ્લાસ્ટમાં સુલેમાન, કારી અને ગુલામ નામના સ્થાનિક રહેવાસીઓનાં ઘટનાસ્થળે જ મોત થયા હતા, જ્યારે મૃતદેહોને તાત્કાલિક ખાર હોસ્પિટલ ખસેડવામાં આવ્યા હતા. આ વિસ્ફોટમાં એક સ્થાનિક નેતા પણ હાજર હતા જેઓ ચમત્કારિક રીતે બચી ગયા હતા, અને પોલીસ તથા ગુપ્તચર એજન્સીઓ દ્વારા હુમલા પાછળના જવાબદાર તત્વોની ભાળ મેળવવા માટે તાબડતોબ તપાસ શરૂ કરી દેવામાં આવી છે.

અફઘાનિસ્તાન સરહદ નજીક આવેલા આ ઉત્તર-પશ્ચિમ પ્રાંતમાં અગાઉ પણ ગત ૨૪ જુલાઈએ બન્નુ જિલ્લામાં થયેલા આત્મઘાતી હુમલામાં ૧૨ જવાનો સહિત ૧૫ સુરક્ષાદળોનાં મોત થયા હતા, જે પાકિસ્તાનની આંતરિક સુરક્ષા વ્યવસ્થા સામે ગંભીર સવાલો ઊભા કરી રહ્યા છે