એડમન્ટન, તા. ૧૮ : કેનેડાના આલ્બર્ટા પ્રાંતના વેઇનરાઇટ સૈન્ય મથકે સ્થાનિક સમય પ્રમાણે શનિવારે બનેલી ગંભીર ઘટના બાદ મોટી આગ ફાટી નીકળી હતી. સંરક્ષણમંત્રી ડેવિડ મેકગિન્ટીએ મોત અને ઈજા થયાની પુષ્ટિ કરી છે. જોકે મૃતકોની સંખ્યા, ઓળખ અને આગનું કારણ જાહેર થયાં નથી. 

કેનેડાના મહત્ત્વના સૈન્ય તાલીમ મથક વેઇનરાઇટમાં ભીષણ આગની ઘટનાથી ચિંતા ફેલાઈ છે. રોયલ કેનેડિયન માઉન્ટેડ પોલીસને સ્થાનિક સમય પ્રમાણે શનિવારે સાંજે ચાર વાગ્યા પછી મથકના તાલીમ વિસ્તારમાં આગ લાગ્યાની જાણ મળી હતી. જોરદાર પવનને કારણે આગ મથકની સીમા વટાવીને બહાર ફેલાઈ હતી. 

સંરક્ષણમંત્રી ડેવિડ મેકગિન્ટીએ પત્રકારોને જણાવ્યું હતું કે મથક પરની ઘટનામાં લોકોનાં મોત થયાં છે અને કેટલાકને ઈજા પહોંચી છે. પરિસ્થિતિ હજુ સક્રિય અને સંવેદનશીલ હોવાનું જણાવી તેમણે સંખ્યા જાહેર કરી નહોતી. તેમણે પોતાના કાર્યકાળમાં અથવા નજીકના ભૂતકાળમાં આવી ઘટના યાદ ન હોવાનું પણ કહ્યું હતું. તેથી હાલ ‘આટલા સૈનિકોનાં મોત’ એવો નિશ્ચિત આંકડો આપવો શક્ય નથી. 

વડાપ્રધાન માર્ક કાર્નીએ ઘટનાને ગંભીર ગણાવી અસરગ્રસ્તો પ્રત્યે સંવેદના વ્યક્ત કરી હતી. આલ્બર્ટાનાં વડાં ડેનિયલ સ્મિથે પણ તેને દુઃખદ ઘટના ગણાવી હતી. સૈન્ય, પોલીસ, અગ્નિશામક દળો અને સ્થાનિક સત્તાવાળાઓ સંયુક્ત કામગીરી કરી રહ્યા છે. સ્થાનિક લોકોને ઘટનાસ્થળથી દૂર રહેવા તથા કટોકટીનાં વાહનો માટે રસ્તા ખુલ્લા રાખવા સૂચના અપાઈ છે. આગનું મૂળ કારણ અને નુકસાનની સંપૂર્ણ વિગતો હજુ સ્પષ્ટ થઈ નથી. 

---