કોલકાતા: પશ્ચિમ બંગાળમાં બે વિધાનસભા બેઠકોના ૧૫ બૂથ પર આજે યોજાયેલા પુનઃમતદાન દરમિયાન દક્ષિણ ૨૪ પરગણાના ફાલ્ટા વિસ્તારમાં હિંસાની મોટી ઘટના સામે આવી છે. ફાલ્ટામાં ભાજપ અને તૃણમૂલ કોંગ્રેસ (TMC) ના કાર્યકરો વચ્ચે ઉગ્ર અથડામણ થતા સ્થિતિ વણસી હતી, જેને કાબૂમાં લેવા માટે સુરક્ષા દળોએ લાઠીચાર્જ કરવો પડ્યો હતો. જોકે, નોંધનીય છે કે ફાલ્ટા બેઠક પર આજે ફરીથી મતદાન થઈ રહ્યું નથી, પરંતુ હિંસાની આશંકાએ થઈ રહેલા વિરોધ પ્રદર્શને હિંસક સ્વરૂપ ધારણ કર્યું હતું.
ધમકીના આરોપ અને કાર્યકરો વચ્ચે ઝપાઝપી
ફાલ્ટામાં ભાજપ સમર્થકોનો આરોપ છે કે ૪ મેના રોજ થનારી મતગણતરી પહેલા TMC ના લોકો તેમને સતત ધમકીઓ આપી રહ્યા છે. આ ધમકીઓના વિરોધમાં જ્યારે ભાજપના કાર્યકરો પ્રદર્શન કરી રહ્યા હતા, ત્યારે TMC કાર્યકરોએ પણ ત્યાં પહોંચી વિરોધ કરતા બંને પક્ષો વચ્ચે હાથાપાઈ શરૂ થઈ ગઈ હતી. આ પ્રદર્શનમાં મહિલાઓ પણ મોટી સંખ્યામાં જોડાઈ હતી. એક સ્થાનિક મહિલાએ આરોપ લગાવ્યો કે TMC ના ઈસરાફિલ ચૌધરીએ તેમને એવી ધમકી આપી છે કે જો તેઓ જીતશે તો લોકોના ઘર સળગાવી દેશે.
૧૫ બૂથ પર મતદાન અને ચુસ્ત સુરક્ષા
બીજી તરફ, મગરાહાટ પશ્ચિમ અને ડાયમંડ હાર્બરના ૧૫ બૂથ પર પુનઃમતદાનની પ્રક્રિયા ચાલુ છે. ચૂંટણી પંચના આંકડા મુજબ બપોરે ૨ વાગ્યા સુધી ૫૫ ટકા મતદાન નોંધાયું હતું. અધિકારીઓના જણાવ્યા મુજબ:
•    મગરાહાટ પશ્ચિમ અને ડાયમંડ હાર્બરમાં અત્યાર સુધી મતદાન શાંતિપૂર્ણ રહ્યું છે.
•    હિંસાગ્રસ્ત વિસ્તારોમાં CRPF અને RAF (રેપિડ એક્શન ફોર્સ) ની તૈનાત કરવામાં આવી છે.
•    ચૂંટણી પંચ વેબકાસ્ટિંગ દ્વારા સમગ્ર પ્રક્રિયા પર બારીકાઈથી નજર રાખી રહ્યું છે.
ચૂંટણી પંચનો મોટો નિર્ણય
૨૯ એપ્રિલે થયેલા મતદાનમાં ભાજપે મોટા પાયે ગેરરીતિના આક્ષેપો કર્યા હતા, જેના આધારે ચૂંટણી પંચે આ ૧૫ બૂથ પર ફરીથી મતદાન કરવાનો આદેશ આપ્યો હતો. આ ઉપરાંત, ફાલ્ટા વિધાનસભા બેઠક પર પણ પુનઃમતદાન કરાવવું કે નહીં, તે અંગે ચૂંટણી પંચ આજે શનિવારે નિર્ણય લેશે. બંગાળ વિધાનસભા ચૂંટણીના બે તબક્કા પૂર્ણ થયા બાદ હવે તમામની નજર ૪ મેના રોજ આવનારા પરિણામો પર ટકેલી છે.