મેડ્રિડ, તા.૨૨: યુરોપના સુંદર દેશ સ્પેનમાં અત્યારે આર્થિક તેજી તો છે, પરંતુ સામાન્ય માણસ માટે પોતાનું ઘર હોવું એક દુઃસ્વપ્ન બની ગયું છે. આ ગંભીર હાઉસિંગ સંકટને પહોંચી વળવા માટે વડાપ્રધાન પેડ્રો સાંચેઝની સરકારે મંગળવારે એક ઐતિહાસિક યોજનાને મંજૂરી આપી છે. સરકાર આ યોજના હેઠળ કુલ 7 બિલિયન યુરો (લગભગ $8.23 બિલિયન) નું જંગી રોકાણ કરવા જઈ રહી છે, જેનો મુખ્ય હેતુ યુવાનો અને મધ્યમ વર્ગના પરિવારોને પરવડે તેવા ભાવે ઘર પૂરા પાડવાનો છે.
જાહેર આવાસમાં ત્રણ ગણો વધારો: યુરોપની સરખામણીએ સ્પેન પાછળ
યુરોસ્ટેટના આંકડા મુજબ, 2025ના અંત સુધીમાં સ્પેનમાં ઘરના ભાવમાં 13% નો તોતિંગ વધારો થયો છે. સ્પેન અત્યારે OECD દેશોમાં જાહેર આવાસ (Public Housing) ની બાબતમાં સૌથી છેલ્લી હરોળમાં છે, જ્યાં માત્ર 2% જ સરકારી મકાનો છે. તેની સરખામણીએ નેધરલેન્ડ્સમાં 34% અને ફ્રાન્સમાં 14% જાહેર આવાસ છે. આ ખાઈને પૂરવા માટે સ્પેન સરકાર આગામી ચાર વર્ષમાં પોતાનું રોકાણ ત્રણ ગણું વધારશે.
યોજનાની મુખ્ય વિશેષતાઓ: શું બદલાશે?
સરકારની આ 7 બિલિયન યુરોની યોજનાને ત્રણ મુખ્ય ભાગમાં વહેંચવામાં આવી છે:
•    40% ફંડ: નવા જાહેર આવાસોના નિર્માણ માટે, જેથી બજારમાં મકાનોનો પુરવઠો વધે.
•    30% ફંડ: જૂની મિલકતોના નવીનીકરણ અને તેને એનર્જી-એફિશિયન્ટ (ઉર્જા-કાર્યક્ષમ) બનાવવા માટે.
•    બાકીનું ફંડ: ખાસ કરીને યુવાન ભાડૂતો અને ઘર ખરીદનારાઓ માટે સબસિડી આપવા માટે વપરાશે.
ખાનગીકરણ પર કાયમી બ્રેક
ભૂતકાળમાં સ્પેનમાં એક મોટી સમસ્યા એ હતી કે સરકાર જાહેર ભંડોળથી મકાનો બનાવતી, પરંતુ થોડા સમય પછી તે ખાનગી માલિકીમાં વેચાઈ જતા. આ યોજનામાં કડક જોગવાઈ કરવામાં આવી છે કે હવે સબસિડીવાળા મકાનોનું પુનઃવર્ગીકરણ કે ખાનગીકરણ કરી શકાશે નહીં. તે હંમેશા જાહેર સ્ટોકનો હિસ્સો રહેશે, જેથી ભવિષ્યની પેઢીને પણ તેનો લાભ મળે.
રાજકીય પ્રતિષ્ઠાનો જંગ
વડાપ્રધાન સાંચેઝ માટે આ માત્ર આર્થિક જ નહીં, પરંતુ રાજકીય અસ્તિત્વની લડાઈ પણ છે. દેશમાં ઇમિગ્રેશન અને પ્રવાસન વધવાને કારણે શહેરોમાં જગ્યાની અછત સર્જાઈ છે અને સ્થાનિક લોકોમાં રોષ છે. ગૃહ મંત્રી ઇસાબેલ રોડ્રિગ્ઝે જણાવ્યું હતું કે, "જનતા હાલમાં તેમની મુખ્ય સમસ્યાના ઉકેલ માટે સરકાર પાસે નક્કર કામગીરીની માંગ કરી રહી છે." આ યોજના આગામી ચૂંટણીઓમાં પણ નિર્ણાયક ભૂમિકા ભજવી શકે છે.