News of Wednesday, 18th November 2026
આર્ટિફિશિયલ ઈન્ટેલિજન્સના વધતા પ્રભાવ વચ્ચે માઈક્રોસોફ્ટનો મોટો નિર્ણય: સાઠ હજાર કર્મચારીઓને સ્વૈચ્છિક રીતે નોકરી છોડવાનો વિશેષ વિકલ્પ અપાયો
ટેકનોલોજી જગતમાં બદલાતા પ્રવાહો અને આર્ટિફિશિયલ ઇન્ટેલિજન્સની અસરો વચ્ચે સીઈઓ સત્ય નાડેલાએ કર્મચારીઓની કારકિર્દીની સ્વતંત્રતાને ધ્યાનમાં રાખીને આ પહેલ શરૂ કરી છે.

નવી દિલ્હી, તા.૧૮: વૈશ્વિક સ્તરે આર્ટિફિશિયલ ઈન્ટેલિજન્સ (AI) ના ઝડપી વ્યાપ અને ટેકનિકલ પરિવર્તનો વચ્ચે અગ્રણી ટેક કંપની માઈક્રોસોફ્ટ દ્વારા એક મોટો નિર્ણય લેવામાં આવ્યો છે, જેના અંતર્ગત કંપનીએ આશરે 60,000 કર્મચારીઓને સ્વૈચ્છિક એક્ઝિટ પ્રોગ્રામ દ્વારા નોકરી છોડવાનો વિકલ્પ આપ્યો છે.
કંપનીના મુખ્ય કાર્યકારી અધિકારી (CEO) સત્ય નાડેલાએ સ્પષ્ટતા કરી છે કે આ પગલાનો હેતુ માત્ર કર્મચારીઓની સંખ્યા ઘટાડવાનો નથી, પરંતુ કર્મચારીઓને બદલાતા ટેકનોલોજી યુગમાં પોતાની કારકિર્દી વિશે સ્વતંત્ર નિર્ણયો લેવાની તક પૂરી પાડવાનો છે.
એક મુલાકાતમાં નાડેલાએ જણાવ્યું હતું કે AI ના આગમનથી સોફ્ટવેર ડેવલપમેન્ટ, કોડિંગ અને ડેટા એનાલિસિસ જેવા કાર્યોની પદ્ધતિઓ ઝડપથી બદલાઈ રહી છે, જેના કારણે કર્મચારીઓની જવાબદારીઓ અને જરૂરી કુશળતામાં પણ મોટો બદલાવ આવી રહ્યો છે.
આ સ્વૈચ્છિક કાર્યક્રમ હેઠળ લાયક કર્મચારીઓને આકર્ષક સેવરેન્સ પેકેજ ઓફર કરવામાં આવી રહ્યા છે, જેથી જો કોઈ કર્મચારીને પોતાની વર્તમાન ટીમમાં પ્રગતિની તકો ઓછી જણાય તો તેઓ સ્વેચ્છાએ અન્ય ક્ષેત્રોમાં નવી તકો શોધી શકે.
માત્ર માઈક્રોસોફ્ટ જ નહીં, પરંતુ ગૂગલ જેવી અન્ય દિગ્ગજ ટેક કંપનીઓ દ્વારા પણ તાજેતરના સમયમાં વૈશ્વિક સ્તરે સમાન પ્રકારના એક્ઝિટ પેકેજો ઓફર કરીને બદલાતી વ્યવસાયિક પ્રાથમિકતાઓને અનુરૂપ સ્ટાફિંગ માળખામાં પુનર્વિચાર કરવામાં આવી રહ્યો છે.
ભવિષ્યના ટેક ઉદ્યોગમાં ટકી રહેવા માટે કર્મચારીઓએ નવી ટેકનોલોજી અને AI સાધનો સાથે અનુકૂલન સાધવું અનિવાર્ય બની ગયું છે, જે આગામી સમયમાં ટેકનોલોજી ક્ષેત્રના કાર્યસંસ્કૃતિનું ચિત્ર સંપૂર્ણપણે બદલી નાખશે.
(5:16 PM IST)









છેલ્લા 8 દિવસમાં સૌથી લોકપ્રિય 
