નવી દિલ્હી : જો તમે પણ વોટ્સએપ કે ઈન્સ્ટાગ્રામ પર ચેટ કરતી વખતે વાત-વાતમાં 'LOL' (Laugh Out Loud) લખવાની ટેવ ધરાવો છો, તો સાવધાન થઈ જજો! આજની નવી પેઢી એટલે કે જનરેશન-ઝેડ (Gen-Z) માટે મિલેનિયલ્સનો આ સૌથી ફેવરિટ શબ્દ હવે આઉટડેટેડ અને કષ્ટદાયક બની ગયો છે. Gen-Z નું માનવું છે કે ચેટમાં LOL લખવું એ એક નકલી અથવા ઓવર-એક્ટિંગ જેવી બાબત છે, જ્યાં વ્યક્તિ ખરેખર હસતી નથી હોતી પણ માત્ર ઔપચારિકતા ખાતર લખી દે છે. તેથી આ નવી પેઢીએ LOL ને સોશિયલ મીડિયા પરથી 'કેન્સલ' કરીને પોતાના નવા સ્લેંગ વર્ડ્સ જનરેટ કર્યા છે.

ચેટિંગમાં હાસ્ય અને પ્રતિક્રિયા દર્શાવવાના નવા શોર્ટ-કોડ્સ

Gen-Z પોતાની ચેટિંગમાં પ્રામાણિકતા અને ચોક્કસાઈ પસંદ કરે છે, તેથી તેમણે દરેક અલગ-અલગ પ્રકારના હાસ્ય અને ઈમોશન્સ માટે નવા શોર્ટ-વર્ડ્સ બનાવ્યા છે. જેમ કે, જો કોઈ વાત પર માત્ર હળવું સ્મિત આવે તો મોટેથી હસવાને બદલે 'LAL' (Laugh A Little) કહેવાય છે. મનમાં ને મનમાં હસવા માટે 'LIMH' (Laughed In My Head) વપરાય છે. આ ઉપરાંત જ્યારે બોસ કે કોઈ મોટા વ્યક્તિના નબળા જોક પર પણ પરાણે હસવું પડે ત્યારે તેને 'LBO' (Laughing By Obligation) તરીકે ઓળખવામાં આવે છે! જ્યારે જોક એટલો રમુજી હોય કે નાકમાંથી હવા નીકળી જાય તો તેના માટે 'ACOOMN' કોડ વપરાય છે.

ફ્લર્ટિંગથી લઈને ગંભીર ચર્ચા માટેના અનોખા ટૂંકાક્ષરો

માત્ર હસવા માટે જ નહીં, પણ ચેટિંગ દરમિયાન મૂડ દર્શાવવા માટે પણ નવા જ શબ્દો સામે આવ્યા છે. જો કોઈ ચેટ એટલી વિચિત્ર હોય કે તેનો સ્ક્રીનશોટ લેવો પડે તો 'IST' (I'm Screenshotting This) લખાય છે. સામેની વ્યક્તિ ફ્લર્ટ કરી રહી હોય તો મસ્તીમાં 'AYF' (Are You Flirting?) પૂછવામાં આવે છે. કોઈ કંટાળાજનક જોક માટે 'TJNW' (That Joke Needs Work) અને કોઈ ચિંતાજનક કે ઊંડા વિષય પર લાંબી ચર્ચા કરવા માટે 'LUT' (Let's Unpack) જેવા શબ્દો વાપરીને આ પેઢીએ ડિજિટલ વાર્તાલાપનો આખો અંદાજ બદલી નાખ્યો છે.