ઈસ્લામાબાદ : પાકિસ્તાનમાં ધાર્મિક લઘુમતીઓની સતત કથળતી જતી હાલત અંગે ફરી એકવાર વૈશ્વિક મંચ પરથી ચિંતા વ્યક્ત કરવામાં આવી છે. 'ઈન્ટરનેશનલ રિલિજિયસ ફ્રીડમ' (IRF) રાઉન્ડ ટેબલ પાકિસ્તાન કન્સલ્ટેશનમાં માનવાધિકાર કાર્યકર્તાઓ અને ધાર્મિક નેતાઓએ પાકિસ્તાનમાં વધી રહેલા ધાર્મિક ભેદભાવ અને કડક કાયદાઓના દુરુપયોગ અંગે લાલબત્તી ધરી છે.
ઈશનિંદા કાયદો અને બ્લેકમેલિંગનો ખેલ
બેઠકમાં સહભાગી થયેલા નિષ્ણાતોએ જણાવ્યું હતું કે પાકિસ્તાનમાં ઈશનિંદા (Blasphemy Laws) કાયદાનો ઉપયોગ હવે અંગત અદાવત સાધવા, બ્લેકમેલ કરવા અને ખંડણી ઉઘરાવવા માટે થઈ રહ્યો છે. સેંકડો નિર્દોષ લોકો પર ખોટા આરોપો લગાવીને તેમને જેલના સળિયા પાછળ ધકેલી દેવામાં આવે છે અથવા ભીડ દ્વારા હિંસાનો ભોગ બનાવવામાં આવે છે. આ કાયદાના દુરુપયોગને કારણે લઘુમતી સમુદાયોમાં સતત ભયનો માહોલ જોવા મળી રહ્યો છે.
યુવતીઓના જબરદસ્તી લગ્ન અને ધર્મ પરિવર્તન
બેઠકમાં સૌથી ગંભીર મુદ્દો લઘુમતી સમુદાયની મહિલાઓ અને બાળકોના ટાર્ગેટિંગનો રહ્યો હતો. આંતરરાષ્ટ્રીય નિષ્ણાતોએ ચેતવણી આપી છે કે હિન્દુ, ખ્રિસ્તી અને શીખ સમુદાયની યુવતીઓનું અપહરણ કરી, તેમના જબરદસ્તી લગ્ન કરાવી ધર્મ પરિવર્તન કરાવવાની પેટર્ન પાકિસ્તાનમાં વ્યાપક બની છે. આ માનવાધિકારોનું ગંભીર ઉલ્લંઘન હોવા છતાં સ્થાનિક પ્રશાસન મૌન ધારણ કરી બેઠું હોવાના આક્ષેપો થયા છે.
અમલીકરણનો અભાવ અને જવાબદારીની માંગ
જોકે પાકિસ્તાન સંસદે વર્ષ ૨૦૨૫માં 'નેશનલ કમિશન ફોર માઈનોરિટી રાઈટ્સ બિલ' પસાર કર્યું છે અને પંજાબ પ્રાંતમાં લઘુમતી મિલકત સુરક્ષાના કાયદા આવ્યા છે, પરંતુ કન્સલ્ટેશનમાં હાજર રહેલા પ્રતિનિધિઓએ સ્પષ્ટપણે જણાવ્યું હતું કે માત્ર કાયદા બનાવવાથી કંઈ વળશે નહીં. જ્યાં સુધી જમીની સ્તર પર આ કાયદાઓનું અમલીકરણ નહીં થાય અને દોષિતો સામે કડક કાર્યવાહી (Accountability) નહીં કરવામાં આવે ત્યાં સુધી લઘુમતીઓની સુરક્ષા શક્ય નથી.
માનવાધિકાર કાર્યકર્તાઓ અને પત્રકારોએ એકસૂરે પાકિસ્તાની સરકાર પાસે ખ્રિસ્તીઓ, હિન્દુઓ અને શીખોના રક્ષણ માટે મજબૂત અને વાસ્તવિક સુરક્ષા કવચની માંગ કરી છે.